Qonunchilik palatasi spikerining birinchi o‘rinbosari Akmal Saidov 23-dekabr kuni Prezident Shavkat Mirziyoyevning Oliy Majlis palatalariga qilgan murojaati bo‘yicha bajarilgan ishlar yuzasidan ma’lumot berdi. Matbuot anjumani yakunida Akmal Saidov O‘zbekistonda siyosiy muxolifat yo‘qligiga qonun yoki parlament aybdor emasligini aytib, siyosiy partiyalar o‘zining muxolifatlik huquqlaridan to‘la foydalanmayotganini tanqid qilib o‘tgan, deb xabar beradi “Kun.uz”.
O‘zbekiston parlamentida muxolifat partiyalar yo‘qligi bo‘yicha berilgan savolga Akmal Saidov mamlakat qonunchiligida “muxolifat” tushunchasi borligini ta’kidlab o‘tgan.
“Bu tushuncha 2007-yilda qabul qilingan konstitutsiyaviy qonunda bor edi. Biz shu yili ‘Davlat boshqaruvini yangilash va yanada demokratlashtirish hamda mamlakatni modernizatsiya qilishda siyosiy partiyalarning rolini kuchaytirish to‘g‘risida’gi konstitutsiyaviy qonunni qabul qilganmiz. Qonun hali hayotda to‘liq o‘z aksini topgani yo‘q. Juda kam davlatlarning qonunchiligida muxolifat tushunchasi bor. Biz qonunda tushunchalar berganmiz va unda muxolifatning huquqlari ham sanab o‘tilgan. Bu huquqlardan siyosiy partiyalarning fraksiyalari foydalandimi, dengchi. Yo‘q. Foydalangani yo‘q. Buning uchun qonun yoki parlament aybdor emas”, – deydi Akmal Saidov.
“Muxolifat. Bu kimga nisbatan muxolifat? Bizda ko‘p yillar bir fikr singdirildi. Unga ko‘ra, partiya fraksiyalari bir-biriga muxolifat bo‘lishi kerakmish. Yo‘q, u hukumatga nisbatan bo‘lishi kerak. Lekin, afsuski, bizda partiya a’zosi bo‘lgan hukumat raisiga shu partiya a’zolarining o‘zi qarshi chiqadi. Men buni tushunmayman. Qani bu yerda partiyaviy intizom? O‘ylashimcha, Prezident mutlaq haq. Qonunda yozib qo‘yish degani hali ish bajarildi, degani emas.
Oxirgi to‘rt yilda shakllangan erkin ovoz, fikrni erkin aytish muxolifatning ilk kurtaklari. Endilikda bo‘lajak vazirlar o‘z dasturlarida nima qilishi, rejalarini aytishi kerak. Endi boshlanyapti. Men hali to‘liq qoniqayotganim yo‘q.
Bizda muxolifat uchun birinchi bosqich – faollik ortyapti. Bu yaxshi. Endi shu jarayonda siyosiy madaniyat ham oshishi kerak. Partiyalar ham jonlanishi kerak. Masalan, ularning o‘tgan saylovlardagi faolliklari menga yoqdi. Men yuz foiz ishonaman, bizda muxolifat ham shakllanadi, muxolifat ham bo‘ladi. Haqiqat bahslarda tug‘iladi. Mana shu kunlarga, albatta, yetamiz”, – deydi Qonunchilik palatasi spikerining birinchi o‘rinbosari.
Avvalroq Akmal Saidov Konstitutsiyaga o‘zgartish kiritish masalasidagi bahslarga munosabat bildirib, bu masalada Qonunchilik palatasi hammasini to‘g‘ri bajargan deb hisoblashini ma’lum qilgandi.
Eslatib o‘tamiz, Shavkat Mirziyoyev 2019-yilning dekabr oxirlarida al-Xorazmiy maktabida yoshlar bilan uchrashuvdagi chiqishida siyosiy muxolifat haqida ham to‘xtalib o‘tgan edi. Prezident muxolifatga qarshi emasligini, lekin u shu yerda shakllanishi kerakligini ta’kidlagan.
Izoh (0)