Shavkat Mirziyoyevning 16 ta farmoniga asosan 2020-yilda 7419 nafar fuqaroligi bo‘lmagan shaxs O‘zbekiston fuqaroligiga qabul qilindi. Bu haqda IIV Fuqarolikni rasmiylashtirish va migratsiya boshqarmasi boshlig‘i, polkovnik Ulug‘bek Muhammedovga tayanib “Kun.uz” ma’lum qildi.
Ulug‘bek Muhammedov davlat rahbarining 2020-yil 24-yanvardagi Oliy Majlisga murojaatida tizim oldiga qo‘yilgan vazifalar ijrosi yuzasidan qilingan boshqa ishlarni ham sanab o‘tdi.
“Prezident murojaatida fuqarolik masalalariga oid qonunchilikni takomillashtirish orqali inson huquqlarini ta’minlash borasida muhim qadam qo‘yish yuzasidan tashkiliy chora-tadbirlar belgilanishi, xususan, ko‘p yillardan buyon O‘zbekiston Respublikasida yashab kelayotgan fuqaroligi bo‘lmagan shaxslarni O‘zbekiston Respublikasi fuqarosi degan sharafli maqomga ega bo‘lishlari bo‘yicha 2020-yil 1-mayga qadar O‘zbekiston parlamenti va hukumatiga tegishli qonun loyihasini taqdim etish lozimligi belgilangan edi.
Shundan kelib chiqib, Ichki ishlar vazirligi tomonidan manfaatdor vazirlik va idoralar bilan hamkorlikda ‘O‘zbekiston Respublikasining fuqaroligi to‘g‘risida’gi qonuni yangi tahrirda ishlab chiqilib, 2020-yil 13-martda qabul qilindi.
Ushbu qonunga asosan, 1995-yil 1-yanvarga qadar O‘zbekistonga kirib kelgan va doimiy ro‘yxatdan o‘tgan, chet davlat fuqaroligini qabul qilmagan hamda ushbu qonun kuchga kirguniga qadar fuqaroligi bo‘lmagan shaxsga O‘zbekistonda yashash guvohnomasi asosida yashab turgan shaxs istak bildirgan taqdirda, O‘zbekistonning fuqarosi deb tan olish tartibi kiritildi va 2020-yil 1-apreldan boshlab ushbu toifadagi shaxslardan hujjatlar qabul qilish boshlandi.
Yangi tahrirdagi qonundagi o‘zgarishlardan yana biri — O‘zbekiston fuqaroligini qabul qilish istagini bildirgan shaxsdan o‘zbek tilini muloqot darajasida bilishi lozimligi belgilandi.
Shuningdek, qonunda O‘zbekiston fuqaroligi masalalariga oid idoralararo ma’lumotlar almashuvi tizimini yaratish kabi masalalar o‘z aksini topgan. Xususan, E-fuqaro idoralararo ma’lumotlar bazasi orqali ma’lumot almashish dasturi ishlab chiqilib, fuqarolik masalalari bo‘yicha arizalar ushbu dastur orqali 12 ta vazirlik va idora bilan kelishish mexanizmi joriy qilindi”, — dedi Ulug‘bek Muhammedov.
Uning qo‘shimcha qilishicha, O‘zbekiston fuqaroligiga qabul qilish va fuqarolikdan chiqish mexanizmlari isloh qilinib, arizaga ilova qilinishi lozim hujjatlar soni 2 baravarga qisqartirilgan.
Avvalroq O‘zbekiston fuqaroligini olishda o‘zbek tilidan imtihon topshirish pullik bo‘lishi, Toshkentda 25 yil hech qayerda qayd etilmagan yigitga fuqarolik pasporti berilgani hamda O‘zbekiston fuqaroligini olish va undan voz kechish jarayonlari onlayn rejimga o‘tkazilishi haqida xabar berilgandi.
Izoh (0)