Ўзбекистон 10 йиллик танаффусдан сўнг Тожикистоннинг Сўғд вилоятига газ етказиб беришни қайта тиклагани ҳақида хабар берилганди. «Gazeta.uz» Sugdnews’га таяниб хабар беришича, 23 декабрь куни вилоятнинг Хўжанд шаҳрида ўзбек газини ишга туширишнинг рамзий маросими бўлиб ўтди.
Вилоятга ўзбек табиий газининг асосий етказиб берувчиси «Сўғдиёнагаз» ҳисобланади. «Дастлабки босқичда Хўжанд шаҳрининг саноат корхоналари газ билан таъминланади. Ҳозирги вақтда уларнинг ярмидан кўпи муқобил ёқилғига ўтишни эълон қилди. Келгусида компания аҳолининг тайёрлигига қараб табиий газни босқичма-босқич етказиб бериш ниятида», — деган компания директори Абдуҳаким Суфиев.
Унинг айтишича, келишувга кўра, Ўзбекистон томони 1000 кубометр табиий газни Тожикистонга 130 доллардан сотишга тайёр бўлиб, бу «жуда қулай нарх». Ўн йил олдин худди шу миқдордаги ёқилғи нархи 340-360 долларни ташкил этган.
Қайд этилишича, Хўжанд шаҳрида 150 дан ортиқ саноат корхоналари фаолият кўрсатмоқда. Улардан баъзилари ўн йилдан кўпроқ вақт олдин, табиий газ етказиб берилиши тўхтатилганда, ёқилғининг бошқа турлари — электр энергияси ва кўмирдан фойдаланган.
Ўзбекистондан Тожикистонга газ етказиб бериш 2012 йилда тўхтатилган эди. 2018 йил сентябрь ойида Ўзбекистон табиий газ таъминотини тиклади.
2020 йилнинг биринчи ярмида Тожикистон Ўзбекистондан 144 миллион кубометр миқдорида табиий газ импорт қилган. Импорт ҳажми, «Тожиктрансгаз» ОАЖ маълумотларига кўра, 17 миллион долларни ташкил этди.
Аввалроқ Тожикистон ўз аҳолисини таъминлаш учун Ўзбекистондан газ импортини кўпайтиришни режалаштираётгани ҳақида хабар берилганди.
Изоҳ (0)