O‘zbekiston 10 yillik tanaffusdan keyin Tojikistonning So‘g‘d viloyatiga gaz yetkazib berishni qayta tikladi. Bu haqda “Somon So‘g‘dgaz” kompaniyasi direktori Abdulhakim So‘fiyevga tayanib, Asia Plus xabar berdi.
Kompaniya direktorining so‘zlariga ko‘ra, O‘zbekistondan import qilinayotgan gaz sanoat korxonalari va aholi uchun mo‘ljallangan. Dastlabki hisob-kitoblarga ko‘ra, import qilinayotgan tabiiy gazning bir kub metri narxi 2 somoniygacha (2020-yil 13-oktabr holatiga 2006 so’m) bo‘lishi mumkin.
“Hozir ishchilar gaz quvurlarini yotqizish ishlarini boshlagan. Yaqin vaqt ichida Xo‘janddagi kichik va o‘rta sanoat korxonalari tabiiy gaz bilan ta’minlanadi. Kelishuvga ko‘ra, O‘zbekiston Tojikistonga 130 dollardan 1000 kub metr tabiiy gaz sotishga tayyor, bu juda arzon. O‘n yil avval bunday hajmdagi gazning narxi 340-350 dollar turardi”, — deya qo‘shimcha qildi So‘fiyev.
Kompaniya rahbarining qayd etishicha, So‘g‘d viloyatida 800 kilometrdan, Xo‘jand shahri hududida esa 400 kilometrdan ortiq gaz quvuri mavjud. Shahardagi quvurlarni ta’mirlash ishlari yakuniga yetish arafasida.
Uning so‘zlariga ko‘ra, gaz quvurlari aholining uyigacha tortib boriladi. Xo‘jand shahrining o‘zida 400 ta gaz qudug‘i bo‘lib, ularning quvurlari to‘liq almashtirilmoqda. 2020-yilning oxiriga qadar shahar aholisi tabiiy gaz bilan ta’minlanadi. Hozirgi paytda esa gaz sanoat korxonalariga yetib borgan. Shuningdek, yaqin vaqt ichida Guliston, Bo‘ston va Bobojon G‘ofurov tumanlari aholisini gaz bilan ta’minlash rejalashtirilmoqda.
O‘zbekistondan Tojikistonga gaz yetkazib berish olti yillik tanaffusdan keyin 2018-yilning aprel oyida qayta tiklangan.
O‘zbekiston gazini Tojikistonga yetkazib berish 2019-yilda 2018-yilga qaraganda 2,6 barobarga yoki 55 million kubometrdan 140 million kubometrga oshgan. 2018-yilda O‘zbekistondan import qilingan gaz qiymati 6,9 million dollarni tashkil qilgan bo‘lsa, 2019-yilda uning qiymati 17,7 million dollarni tashkil qilgan.
O‘zbekiston gazining asosiy iste’molchisi Tojikiston alyuminiy zavodi hisoblanadi. Shuningdek, O‘zbekiston gazini boshqa bir qator kompaniyalar, jumladan, Dushanbe IES ham oladi.
O‘zbekiston Energetika vazirligining ma’lumotlariga ko‘ra, 2020-yilning sakkiz oyida Tojikiston O‘zbekistondan 139,5 million kubometr gaz oldi. Tuzilgan shartnomaga ko‘ra, 2020-yilning oxirigacha Tojikistonga 200 million kubometr tabiiy gaz yetkazib berish rejalashtirilmoqda.
Avvalroq Tojikiston o‘z aholisini ta’minlash uchun O‘zbekistondan gaz importini ko‘paytirishni rejalashtirayotgani haqida xabar berilgandi.
Izoh (0)