Butun dunyo bo‘ylab 387 nafar jurnalist o‘z professional vazifalarini bajarganligi yuzasidan hibsda qolmoqda. Bu haqda “Chegara bilmas muxbirlar” (Reporters sans frontiers, ChBM) tashkiloti 14-dekabr kuni taqdim etgan an’anaviy yillik ma’ruzada aytiladi.
Bu 2019-yildagidan kamroq (o‘tgan yili 389 jurnalist hibsga olingan) bo‘lsa-da, butun dunyo bo‘yicha jurnalistlarni hibsga olish holatlari soni tarixiy yuqori darajada qolmoqda, deya qayd etadi tashkilot.
Ma’ruzada ta’kidlanishicha, jurnalistlarning o‘z kasblari yuzasidan hibsga olinishi holatlarining 61 foizi bor-yo‘g‘i beshta mamlakat hissasiga to‘g‘ri keladi: 117 nafar jurnalist Xitoyda ozodlikdan mahrum etilgan, 34 nafari — Saudiya Arabistonida, 30 nafari — Misrda, 28 nafari — Vyetnamda va 27 nafari — Suriyada.
Hibsda saqlanayotgan ayol jurnalistlar soni 35 foizga oshgan: 2020-yil oxirida 42 nafar ayol ozodlikdan mahrum etilgan. Bir yil avval ularning soni 31 nafarga teng edi. Yangi hibsga olish holatlari asosan 9-avgustdagi prezident saylovlaridan keyin misli ko‘rilmagan repressiyalarni boshidan kechirayotgan Belarusda (4 kishi), shuningdek, repressiyalar sanitar inqiroz tufayli kuchaygan Eronda (4) va Xitoyda (2) ham yuz berdi, deyiladi ma’ruzada.
“Chegara bilmas muxbirlar” ma’lumotlariga ko‘ra, g‘ayriqonuniy ravishda hibsga olish va jurnalistlarni qo‘lga olish holatlari dunyo bo‘ylab koronavirus tarqalishi boshlangan paytda — 2020-yil martidan mayigacha bo‘lgan davrda to‘rt marta oshgan. Fevral boshidan noyabr oxirigacha jami qayd etilgan huquq buzilishi holatlarining 35 foizi shunday huquq buzilishlari hissasiga to‘g‘ri kelgan (ularning soni jismoniy zo‘ravonlik va tahdid holatlaridan ham ko‘proq, ularning hissasi 30 foizga teng). Epidemiya mavzusini yoritganligi yuzasidan hibsga olingan jurnalistlardan 14 nafari hozir ham qamoqda qolmoqda.
Bundan tashqari, dunyo bo‘yicha 54 jurnalist garovda qolmoqda, yana 4 kishi bedarak yo‘qolgan.
2020-yilda o‘ldirilgan jurnalistlar sonini tashkilot 29-dekabr kuni o‘zining yillik hisobotida e’lon qiladi.
Mavzuga doir:
- O‘zbekiston “Chegara bilmas muxbirlar”ning so‘z erkinligi bo‘yicha reytingida yuqoriladi
- O‘zbekiston matbuot erkinligi reytingida ko‘tarildi, ammo ro‘yxatning oxirida qolmoqda
- Dunyoda nechta ayol jurnalist hibsda saqlanmoqda? Italiyaning qaysi partiyasini Rossiya boqmoqda? Jahon matbuoti sharhi
- Yil boshidan buyon 56 jurnalist kasbiy faoliyati tufayli o‘ldirilgan
- 2017-yili dunyoda 65 nafar jurnalist halok bo‘ldi
Izoh (0)