JSST: Bir haftada COVID-19’ga chalinish bo‘yicha antirekord o‘rnatildi

7-dekabrdan 13-dekabrgacha bo‘lgan bir hafta ichida dunyo bo‘yicha yana 4,3 million kishi koronavirusga chalindi, deb yozadi “RBK” Jahon sog‘liqni saqlash tashkiloti (JSST)ning epidemiologik byulleteniga tayanib.

Bu pandemiya boshidan buyon kuzatilgan eng katta ko‘rsatkichdir. Bir haftalik maksimum bundan avval 16—22-noyabr davrida qayd etilgan edi. O‘shanda dunyoda 4 millionta kasallanish holati aniqlangan edi.

Yangi yuqtirib olish holatlarining deyarli yarmi — 2 milliontasi Shimoliy va Janubiy Amerika hissasiga to‘g‘ri keldi. Bir hafta ichidagi eng ko‘p kasallanganlar AQShda qayd etildi — 1,45 million kishi. Bu o‘tgan haftadan 16 foizga ko‘p demakdir.

Haftalik o‘sish bo‘yicha yetakchi mamlakatlar beshligiga quyidagilar ham kirdi:

• Braziliya — 300 nafar yangi bemor (o‘tgan haftaga nisbatan o‘sish 2 foiz);
• Turkiya — 220 ming kishi (o‘tgan haftaga nisbatan o‘zgarishsiz);
• Hindiston — 210 ming kishi (pasayish 15 foiz);
• Rossiya — 193 ming kishi (o‘sish 1 foiz).

Bu davrda Shimoliy va Janubiy Amerika hissasiga 29,8 mingta o‘lim to‘g‘ri keldi. AQShda bir haftada 16,6 ming, Braziliya va Meksikada — har bittasida 4 mingdan ortiq kishi koronavirusdan vafot etdi.

JSST ma’lumotlariga ko‘ra, pandemiya boshidan buyon dunyo bo‘yicha 70,4 milliondan ziyod kishi koronavirusni yuqtirib oldi, 1,6 million kishi kasallikdan vafot etdi. Jons Hopkins universiteti yig‘ma statistikasi bo‘yicha esa bu ko‘rsatkichlar yuqoriroq — 73,2 million nafar bemor va 1,63 millionta o‘lim.

Avvalroq COVID-19 bo‘yicha JSSTning maxsus vakili Devid Nabarro Buyuk Britaniyada aniqlangan COVID-19’ning yangi turi tez tarqalish xususiyatiga ega, lekin xavflilik darajasi yuqori emasligini ma’lum qilgan edi. Shu bilan birga, Nabarro jamoatchilikni mavjud vaziyatda hushyor bo‘lishga chaqirgan.