Rossiyada COVID-19’ga qarshi emlash boshlandi

Rossiyaning barcha hududlarida koronavirusga qarshi emlash boshlandi. Bu haqda sog‘liqni saqlash vaziri Mixail Murashko COVID-19 tarqalishiga qarshi kurash kengashi majlisida ma’lum qildi, deb yozadi “RIA Novosti”.

Uning ta’kidlashicha, barcha hududlar vaksinani qabul qilishga tayyor, yetkazib berish, saqlash va emlash sifati parametrlari hamda bemorlar va tibbiy xodimlar uchun eslatmalar ishlab chiqilgan.

“Sog‘liqni saqlash vazirligi dorini hududlarga yetkazib berish uchun taqsimlash bo‘yicha kelasi uch oyga mo‘ljallangan reja tuzdi”, — dedi bosh vazir Mixail Mishustin.

Uning aniqlik kiritishicha, vaksina ishlab chiqaruvchilar har hafta Sog‘liqni saqlash vazirligiga topshirilgan dorilar haqida axborot uzatishi kerak bo‘ladi, vazirlik esa ikki kun ichida vaksinani ehtiyojga qarab hududlar bo‘yicha taqsimlaydi.

Rossiyada koronavirusga qarshi keng ko‘lamli emlash ishlarini boshlash haqida prezident Vladimir Putin dekabr boshida buyruq bergan, birinchi navbatda xavf guruhidagi fuqarolar emlanishi kerakligini aytgan edi.

Rossiyada ikkita vaksina ro‘yxatdan o‘tkazilgan: Gamaleya markazi tomonidan ishlab chiqilgan “Sputnik V” va Novosibirskning “Vektor” markazi tomonidan yaratilgan “EpiVakKorona”. Har ikkala preparat uchinchi sinov bosqichida va u hali davom etmoqda. “Sputnik V” ishlab chiqaruvchilar uning 95 foiz samadorligini ma’lum qilgan.

Eslatib o‘tamiz, AQShda 14-dekabr kuni koronavirusga qarshi emlash boshlandi. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda.

2-dekabr kuni Buyuk Britaniya dunyoda birinchi bo‘lib Pfizer’ning koronavirusga qarshi vaksinasidan foydalanishni ma’qullagan edi. Shundan keyin Britaniya dunyoda birinchi bo‘lib koronavirusga qarshi vaksinatsiyani boshlashi xabar berildi. 4-dekabr kuni esa Bahrayn ham Pfizer vaksinasidan foydalanishni ma’qulladi. Shuningdek, Pfizer va BioNTech vaksinasi AQShda hamda Meksikada ham ma’qullandi.