Rossiyada koronavirus pandemiyasi sharoitida o‘lim darajasi so‘nggi 10 yil ichida eng yuqori darajaga yetdi. Meduza’ning xabar berishicha, bu haqda “Rosstat” ma’lumotlariga tayanib “RBK” tomonidan o‘tkazilgan hisob-kitoblar guvohlik bermoqda.
2020-yil yanvar—oktabr oylarida o‘lim darajasi aholining 10 ming nafariga 113,2 kishini tashkil etdi. Bu 2010-yildan buyon eng yuqori ko‘rsatkich bo‘lib, o‘sha vaqtda har 10 ming kishiga 119,3 ta o‘lim to‘g‘ri kelgan, o‘limlar soni Rossiyada yoz faslining anomal issiq bo‘lgani sababli oshgandi.
“Rosstat” ma’lumotlariga ko‘ra, 2020-yil yanvar—oktabr oylarida o‘lganlarning umumiy soni 1,661 million kishiga yetdi. Bungacha oxirgi marta yuqori o‘lim darajasi 2010-yilning yanvar—oktabr oylarida yuqori bo‘lgan va 1,704 million kishini tashkil etgan.
“RBK” ham 2020 yil aprel—oktabr oylarida ortiqcha o‘lim holatlarini hisoblab chiqqan. Nashr ma’lumotlariga ko‘ra, bu 140,2 ming kishini tashkil etgan. Shu davrda COVID-19’dan vafot etganlarning umumiy soni “Rosstat” tomonidan 78,6 ming nafar deb qayd etilgan. Qolgan yo‘qotishlar koronavirusdan o‘limni hisobga olmaslik, pandemiyaning bilvosita ta’siri, xususan, sog‘liqni saqlash tizimidagi yuklamalar ortgani bilan ham bog‘liq bo‘lishi mumkin.
Avvalroq Rossiyada oktabr oyidagi vafot etganlar soni 2019-yilgi ko‘rsatkichdan 30 foizga ko‘p bo‘lgani, pandemiya boshidan buyon ortiqcha o‘lim holatlari 138 mingtadan oshgani haqida xabar berilgan edi.
Izoh (0)