Tojikiston prezidenti Emomali Rahmon 15-dekabr kuni AQShning saylangan prezidenti Jo Baydenga tabrik telegrammasini jo‘natdi. Bu haqda Asia Plus xabar berdi.
Emomali Rahmonning o‘z tabrigida qayd etishicha, Tojikiston AQSh bilan hamkorlikning ko‘p tomonlama munosabatlarini mustahkamlash va kengaytirishni o‘z tashqi siyosatining muhim yo‘nalishlaridan biri sifatida ko‘radi hamda ularning bugungi kundagi holatini yuqori baholaydi.
Emomali Rahmon Tojikiston tomonining turli sohalarda o‘zaro manfaatli hamkorlikni rivojlantirishga va barcha darajalarda ikki mamlakat o‘rtasidagi konstruktiv muloqotni davom ettirishga tayyorligini bildirgan.
Tojikiston prezidenti Jo Baydenga mustahkam sog‘lik, baxt va keyingi mas’uliyatli faoliyatida muvaffaqiyat, Amerika xalqiga esa tinchlik, barqarorlik, taraqqiyot va farovonlik tilagan.
Eslatib o‘tamiz, saylovchilar hay’ati Jo Baydenning AQSh prezidenti etib saylanganini tasdiqladi. Bayden uchun saylovchilarning 306 ta, Donald Tramp uchun 232 ta ovozi berilgan. G‘alaba uchun esa 270 ta ovoz to‘plash kerak edi.
Avvalroq Rossiya prezidenti Vladimir Putin Jo Baydenni AQSh prezidenti saylovlaridagi g‘alabasi bilan qutlab, tabrik telegrammasini jo‘natgandi.
Izoh (0)