Tramp AQSh bosh prokurorining iste’fosi haqida e’lon qildi

AQSh adliya vaziri, bosh prokuror Uilyam Barr 23-dekabr kuni o‘z lavozimini tark etadi. Uning birinchi o‘rinbosari Jeff Rozen bosh prokuror vazifasini vaqtinchalik bajaruvchi bo‘ladi. Bu haqda amaldagi davlat rahbari Donald Tramp e’lon qildi, deb yozadi Meduza.

“Hozirgina Oq uyda bosh prokuror Bill Barr bilan juda yoqimli uchrashuv o‘tkazdim. Bizning munosabatlarimiz juda yaxshi edi, u o‘z ishini a’lo darajada bajardi! Bill o‘z xatida lavozimidan Rojdestvo arafasida ketishi, bayramni oilasi davrasida o‘tkazishi haqida yozgan”, — deya qayd etdi Tramp o‘z Twitter’ida.

Nashr eslatishicha, avvalroq Amerika OAVlari prezident bosh prokurordan norozi ekanligini, bunga uning prezident saylovlarida katta ko‘lamli firibgarliklar bo‘lmagani haqida ommaga e’lon qilgani sabab bo‘lganini yozgan edi.

Bosh prokurorning iste’fosi haqidagi xabarlar saylovchilar hay’atidagi ovoz berish yakunlari bilan bir vaqtda paydo bo‘ldi.

Eslatib o‘tamiz, saylovchilar hay’ati ko‘pchilik ovoz bilan demokrat Jo Baydenni AQSh prezidenti saylovlarining g‘olibi deya tasdiqladi. 23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.

Saylovlardan keyin Donald Tramp ovoz berish natijalarini tan olmadi va ular yuzasidan sudga da’vo berdi. Uning huquqshunoslari sudlarga o‘nlab turli da’volar bilan murojaat qilib, ovozlarni qayta sanash yoki natijalarni bekor qilishni talab qildi. Sudlar ulardan ba’zilarinigina qondirdi, ammo bu saylov natijalariga ahamiyatli ta’sir o‘tkazmadi.

Noyabr oxirida Tramp jurnalistlarga agar saylovchilar hay’ati Jo Baydenga ovoz bersa, Oq uydan ketishini aytgandi.