Saylovchilar hay’ati Jo Baydenning AQSh prezidenti saylovlaridagi g‘alabasini tasdiqladi

Saylovchilar hay’ati ko‘pchilik ovoz bilan demokrat Jo Baydenni AQSh prezidenti saylovlarining g‘olibi deya tasdiqladi. Bu haqda Meduza xabar bermoqda.

Baydenga 306 saylovchi, uning raqibi, amaldagi AQSh prezidenti Donald Trampga 232 saylovchi ovoz berdi. G‘alaba uchun 270 ta ovoz to‘plash kerak — Bayden ushbu marradan saylovchilarning Kaliforniyadagi majlisidan keyin o‘tgan edi. Ovoz berishda 50 ta shtat va Kolumbiya okrugidan jami 538 saylovchi qatnashadi.

AQShda prezident ikki bosqichli tizim asosida saylanadi. Nomzodning har bitta alohida shtatdagi umumxalq saylovidagi g‘alabasi saylovchilar hay’ati a’zolarining muayyan soniga muvofiq keladi — ularning soni shtat aholisi soniga proporsional bo‘ladi, Kaliforniya (55), Texas (38), Nyu-York (29) va Florida (29) eng ko‘p ovozga ega.

Saylovchilar hay’ati a’zolari o‘zlari vakillik qilayotgan shtat aholisining ko‘pchiligi qo‘llab-quvvatlagan nomzodni rasman prezidentlikka saylaydi.

23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.

AQSh prezidenti saylovlarida, dastlabki natijalarga ko‘ra, demokrat Jo Baydenga 81,2 million amerikalik ovoz berdi, bu tarixiy maksimum hisoblanadi.

Saylovlardan keyin Donald Tramp ovoz berish natijalarini tan olmadi va ular yuzasidan sudga da’vo berdi. Uning huquqshunoslari sudlarga o‘nlab turli da’volar bilan murojaat qilib, ovozlarni qayta sanash yoki natijalarni bekor qilishni talab qildi. Sudlar ulardan ba’zilarinigina qondirdi, ammo bu saylov natijalariga ahamiyatli ta’sir o‘tkazmadi.

Noyabr oxirida Tramp jurnalistlarga agar saylovchilar hay’ati Jo Baydenga ovoz bersa, Oq uydan ketishini aytgandi.