Тожикистон президенти Эмомали Раҳмон 15 декабрь куни АҚШнинг сайланган президенти Жо Байденга табрик телеграммасини жўнатди. Бу ҳақда Asia Plus хабар берди.
Эмомали Раҳмоннинг ўз табригида қайд этишича, Тожикистон АҚШ билан ҳамкорликнинг кўп томонлама муносабатларини мустаҳкамлаш ва кенгайтиришни ўз ташқи сиёсатининг муҳим йўналишларидан бири сифатида кўради ҳамда уларнинг бугунги кундаги ҳолатини юқори баҳолайди.
Эмомали Раҳмон Тожикистон томонининг турли соҳаларда ўзаро манфаатли ҳамкорликни ривожлантиришга ва барча даражаларда икки мамлакат ўртасидаги конструктив мулоқотни давом эттиришга тайёрлигини билдирган.
Тожикистон президенти Жо Байденга мустаҳкам соғлик, бахт ва кейинги масъулиятли фаолиятида муваффақият, Америка халқига эса тинчлик, барқарорлик, тараққиёт ва фаровонлик тилаган.
Эслатиб ўтамиз, сайловчилар ҳайъати Жо Байденнинг АҚШ президенти этиб сайланганини тасдиқлади. Байден учун сайловчиларнинг 306 та, Дональд Трамп учун 232 та овози берилган. Ғалаба учун эса 270 та овоз тўплаш керак эди.
Аввалроқ Россия президенти Владимир Путин Жо Байденни АҚШ президенти сайловларидаги ғалабаси билан қутлаб, табрик телеграммасини жўнатганди.
Изоҳ (0)