Siyosatchi Aleksey Navalniy unga nisbatan Federal xavfsizlik xizmati (FSB) tomonidan uyushtirilgan suiqasd prezident Vladimir Putinning buyrug‘i bilan amalga oshirilganiga ishonchi komilligini aytdi. Meduza’ning xabar berishicha, bu haqda u “Exo Moskvi” radiostansiyasi efirida ma’lum qildi.
“Putin ushbu vaziyatni boshqarayotganiga menda zarracha shubha yo‘q”, — degan Navalniy.
“Biz bu yerda o‘nlab odamlar, shu jumladan, bir nechta FSB generallari ishtirok etgan qariyb to‘rt yil davom etgan operatsiyani ko‘ryapmiz”, — degan siyosatchi va FSB direktori Aleksandr Bortnikov Putin buyrug‘isiz hech qachon bunday qilmasligini, chunki bu Jinoyat kodeksiga ko‘ra haqiqiy terrorchilik harakati” ekanligini qo‘shimcha qilgan.
Rossiya hukumati Aleksey Navalniyga qilingan suiqasdga aloqadorligini avvalroq bir necha bor rad etgan, shuningdek, siyosatchi zaharlanishi faktini shubha ostiga olgan.
14-dekabr kuni Navalniyning zaharlangani bo‘yicha The Insider, Bellingcat va CNN’ning Der Spiegel ishtirokida hamkorlikda o‘tkazilgan tekshiruv natijalari e’lon qilindi. Tergov mualliflari siyosatchiga suiqasdni Tomskda FSB kriminalistika instituti niqobi ostida harakat qilgan FSB maxfiy bo‘limining 8 nafar tezkor xodimi tomonidan amalga oshirilgan, degan xulosaga kelgan. Tergov hujjatida suiqasd tafsilotlari ham, unda ishtirok etgan FSB xodimlarining ism-shariflari ham oshkor qilingan.
New York Times gazetasining Germaniya razvedka xizmatidagi manbasi The Insider, Bellingcat va CNN tomonidan Der Spiegel ishtirokida o‘tkazilgan tergov “biz bilgan hamma narsani qamrab olgan”ini bildirgan.
Navalniy uning zaharlanishi ortida Putin turganini avval ham ta’kidlagandi. Yevropa Ittifoqi Aleksey Navalniyning zaharlangani sababli Rossiyaning olti nafar mansabdor shaxsiga qarshi sanksiya joriy qilgan.
Izoh (0)