Пашинян Қорабоғда ҳалок бўлганлар хотирасига уч кунлик мотам эълон қилди

19 декабрдан Арманистонда Тоғли Қорабоғдаги жанговар ҳаракатлар чоғида ҳалок бўлганлар хотирасига уч кунлик умуммиллий мотам эълон қилинади. Бу ҳақда мамлакат бош вазири Никол Пашинян халққа мурожаатида маълум қилди, деб ёзади «РБК».

«Эҳтимол, 19 декабрь ҳолати бўйича қурбон бўлган ҳарбийларимизнинг барча жасадлари топилмас, кўплаб шахси номаълум жасадлар бўлар. Лекин бундай давлат қарорини бошқа кечиктирмаслик керак деб ҳисоблайман», — деди Пашинян.

Мотам маросимлари чоғида Ереванда Республика майдонидан «Ералбур» қабристонигача тантанали юриш ташкил қилинади.

Бош вазир эслатишича, 19 декабрь куни Тоғли Қорабоғдаги жанглар тугаганига 40 кун тўлади. Унинг таъкидлашича, ҳалок бўлганларнинг жасадларини қидириш ва уларнинг шахсини аниқлаш ишлари давом эттирилади.

Дастлабки маълумотларга кўра, Озарбайжон билан қуролли низолар чоғида 27 сентябрдан 9 ноябрга қадар Арманистон томондан 3,3 мингдан ортиқ ҳарбий хизматчи ҳалок бўлган ва бедарак йўқолган. Озарбайжон Мудофаа вазирлиги маълумотларига кўра, жангларда қарийб 2,8 минг ҳарбий хизматчи ҳалок бўлган. 1,2 мингдан ортиғи яраланган ва госпиталларда даволанмоқда, яна юзга яқин ҳарбий бедарак йўқолган деб ҳисобланади.

Никол Пашинян халққа қаратилган мурожаатида, шунингдек, сайлов ўтказилмасидан туриб ҳукумат раҳбари лавозимидан кетмаслигини маълум қилди. У Россия ва Озарбайжон президентлари билан биргаликда Тоғли Қорабоғда урушни тўхтатиш ҳақида баёнот имзолагани учун мухолифат унинг истеъфосини талаб қилмоқда.

«Менга халқ томонидан берилган мақомдан фақат халқ хоҳиш-истагининг ишончли натижалари асосидагина бош тортишим мумкин. Ҳозирча бундай хоҳиш-истак йўқ экан, бош вазир вазифаларини бажаришда давом этаман», — деди Пашинян.

Эслатиб ўтамиз, 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Шундан сўнг Арманистонда ушбу битим сабаб норозилик намойишлари бошланди ва у икки ҳафтадан буён давом этмоқда. Битимга кўра, Озарбайжон минтақа ҳудудининг катта қисмини олган. Мухолифат Пашинян «хоинлик» шартномаси имзолангани сабабли истеъфога чиқишини талаб қилмоқда.

Аввалроқ Арманистон Озарбайжон қуролли кучлари томонидан Тоғли Қорабоғда ҳужум бошлаганини эълон қилган эди. Россия Мудофаа вазирлиги сулҳ бузилганлигини тасдиқлади.