AQShda COVID-19 koronavirus infeksiyasiga qarshi vaksina bilan birinchi navbatda emlanadiganlar guruhiga yuqori darajali mansabdorlar, shu jumladan, Oq uyning ba’zi vakillari ham kiradi. Bu haqda Oq uy qoshidagi Milliy xavfsizlik kengashi matbuot xizmatiga tayanib, “RBK” xabar bermoqda.
“Hokimiyatning barcha uchta tarmog‘idagi yuqori mansabli amaldorlar ijro hokimiyati tomonidan belgilangan protokollarga muvofiq emlanadi”, — dedi matbuot xizmati vakili Jon Elliot.
Oq uyda COVID-19 bilan oktabrda kasallanib o‘tgan AQSh prezidenti Donald Tramp vaksina olish-olmasligiga aniqlik kiritishmadi. Ammo Bloomberg o‘z manbasiga tayanib yozishicha, davlat rahbariga birlamchi tartibda emlanish taklif etiladi.
Keyinroq Donald Tramp o‘z Twitter’ida hozircha COVID-19’ga qarshi vaksina olishni rejalashtirmayotganini ma’lum qildi.
“Oq uyda ishlaydigan odamlar vaksinatsiya dasturi doirasida sal keyinroq emlanishi kerak, agar bunga alohida ehtiyoj bo‘lmasa. Men shunday tuzatish kiritishni so‘radim”, — deb yozdi Amerika yetakchisi.
Tramp aniqlik kiritishicha, uning o‘zi hozircha vaksina olmaydi, ammo vaqti kelganida emlanish imkoniyatini “intiqlik bilan kutadi”.
Bu axborotni Reuters manbasi tasdiqladi, unga ko‘ra, amerikalik boshqa yuqori darajali mansabdorlar, shu jumladan, vitse-prezident Maykl Pensda 14-dekabr, dushanba kuniyoq vaksina olish imkoniyati bo‘ladi. Amaldagi prezidentning raqibi demokrat Jozef Bayden va uning jamoasi a’zolariga bunday taklif berilishi esa noma’lum.
Amerika rahbariyati o‘n kun davomida emlanadi, bu mansabdorlar ikkilamchi ta’sirlarni bir vaqtning o‘zida boshdan o‘tkazmasligi uchun qilinadi.
Eslatib o‘tamiz, Amerikaning Pfizer va Germaniyaning BioNTech kompaniyalari tomonidan hamkorlikda ishlab chiqarilgan vaksinaning ilk partiyalari AQSh vaksinatsiya markazlariga 14-dekabr, dushanba kuni yetkazib berilishni boshlaydi.
12-dekabr kuni AQSh Oziq-ovqat mahsulotlari va dori vositalarini nazorat qilish boshqarmasi (FDA) Pfizer va BioNTech kompaniyalari tomonidan yaratilgan koronavirusga qarshi vaksinalardan foydalanishga ruxsat berdi.
AQSh prezidenti Donald Trampning ma’lum qilishicha, vaksinaning birinchi dozasini yuborish ishlari “24 soatdan kamroq vaqt ichida” amalga oshiriladi.
Amerikaning Pfizer farmatsevtik giganti bilan birga COVID-19’ga qarshi vaksina yaratgan Germaniyaning BioNTech bioinjiniring kompaniyasi rahbari Ugur Shahin AQShda vaksinatsiya jarayoni normal kechgan holda, 2021-yil yozi oxiriga kelib, koronavirus infeksiyasi pandemiyasini nazorat ostiga olishga muvaffaq bo‘lish mumkinligi haqida aytib o‘tdi.
So‘nggi ma’lumotlarga ko‘ra, AQShda pandemiya boshidan buyon 16 020 646 kishi koronavirusga chalingan, 297 575 kishi kasallikdan vafot etgan.
Izoh (0)