Yaponiya prokuraturasi sobiq bosh vazir Sindzo Abening kotiblardan biriga nisbatan saylovchilarni sotib olish sxemasi bo‘yicha ish qo‘zg‘atdi, deb xabar beradi “Kommersant”. Kyodo agentligining ma’lum qilishicha, Tokio okrug prokuraturasi Yaponiya sobiq bosh vaziri Sindzo Abeni 2015-yildan 2019-yilga qadar Liberal-demokratlar partiyasi tarafdorlari uchun o‘tkazilgan banketlarning moliyalashtirilishi ishi bo‘yicha so‘roq qilish niyatida.
NHK telekanalining ma’lum qilishicha, so‘roq shanba kunidan keyin bo‘lib o‘tishi mumkin. Hozirda sobiq bosh vazirga so‘roqqa yetib kelish uchun chaqiruv qog‘ozi yuborilgan.
Sindzo Abening kotiblaridan biriga qarshi ish qo‘zg‘atilgan, u Abening tarafdorlari uchun uyushtirilgan bazmlarga ketgan xarajatlarni yashirishda gumon qilinmoqda. Buni saylov qonunchiligiga zid deb topishlari mumkin. Gumon qilinayotgan kotib tadbirlarni tashkil qiluvchi guruhga rahbarlik qilgan.
Bazmdagi har bir insondan 5 ming iyena (taxminan 46 dollar) olingan. Biroq bazmlar uyushtirilgan mehmonxonalar yuqori klassga oid bo‘lgan va kishi boshiga to‘lovlar odatdagidan ancha baland bo‘lgan. 2015-yildan beri uyushtirilgan bazmlarga 191 ming dollardan ortiqroq mablag‘ sarflangan — bu summa mehmonlardan yig‘ilgan pullardan ancha ko‘p. Mehmonlarning aksariyati Abe tug‘ilib o‘sgan Yamaguti prefekturasidagi saylov uchastkalaridan bo‘lgan. 2019-yilning noyabrida muxolif partiyalar bazmlarga sarflangan va mehmonlardan yig‘ilgan summa orasida farq borligini ma’lum qilgandi.
Eslatib o‘tamiz, Sindzo Abe 2020-yilning avgustida iste’foga chiqqandi. U hukumat boshqaruviga ilk bor 2006-yil kelgan, 2007-yil vazirlariga bildirilgan ishonch tushib ketgani uchun amaldan ketgandi. Davlat boshqaruviga ikkinchi bor 2012-yil kelgan Abe Yaponiyani bu safar 7 yildan ortiq boshqardi. Ikkinchi iste’fosini u salomatligidagi muammolar bilan izohlagandi. Sindzo Abe hukumat boshqaruvida rekord darajada uzoq ishlagan.
Izoh (0)