Rossiyada 3-dekabr soat 11:00 holatiga ko‘ra yana 28 145 kishida koronavirus aniqlandi, deb xabar bermoqda Meduza, COVID-19’ga qarshi kurashish tezkor shtabiga tayanib.
Bu kasallanganlar soni sutkalik o‘sishi bo‘yicha pandemiya davridan buyon yuqori ko‘rsatkich. Bir kun avval 25 345 kishida COVID-19 aniqlangandi. Kasallanganlarning umumiy soni 2 375 546 nafarga yetdi.
Yangi aniqlangan kasallanish holatlarining eng ko‘pi Moskva (7750 ta), Sankt-Peterburg (3692 ta) shaharlarida hamda Moskva (1193 ta), Nijniy Novgorod (481 ta) va Kareliya (472 ta) viloyatlarida aniqlangan.
So‘nggi sutkada koronavirusdan 554 kishi vafot etgan. Bundan bir kun avval COVID-19 bemorlarining 589 nafari vafot etib, kunlik o‘limlar soni bo‘yicha pandemiya davridan buyon rekord ko‘rsatkich bo‘lgandi. Tezkor shtab ma’lumotlariga ko‘ra, mamlakatda COVID-19’dan jami 41 053 kishi vafot etgan.Bir kecha-kunduzda mamlakatda COVID-19 bemorlarining 29 502 nafari sog‘aygan (bundan bir kun avval 26 882 kishi sog‘aygandi). Mamlakatda umumiy hisobda 1 859 851 kishi koronavirusdan tuzalgan.
Shtab ma’lumotlariga ko‘ra, Rossiyada ayni paytda 474 088 kishi koronavirusdan davolanmoqda.
“Rospotrebnadzor” ma’lumotlariga ko‘ra, mamlakatda koronavirusni aniqlash uchun so‘nggi 24 soatda 493 mingta test o‘tkazilgan. Bir kun avval 444 mingta test o‘tkazilgandi. Pandemiya boshlanganidan buyon o‘tkazilgan testlar soni 77,6 milliontadan oshgan.
Izoh (0)