Sankt-Peterburg hukumati turistlarga murojaat yo‘llab, koronavirus pandemiyasi sabab Yangi yil bayramlarida shaharga kelmaslikni so‘radi, deb xabar beradi “Interfaks”.
“Biz mehmonlarni, turistlarni juda yaxshi ko‘ramiz, biroq kechirasiz, joriy yilda emas. Shu sababli biz shaharning turistik jozibadorligini kamaytirib, mehmonlarga murojaat yo‘llayapmiz: keling, sog‘lig‘imiz, farzandlarimiz va mahalliy aholi sog‘lig‘i haqida qayg‘uraylik. Bu yil bizning oldimizga kelish shart emas”, — deydi shahar gubernatori o‘rinbosari Yevgeniy Yelin.
Gubernator o‘rinbosarining so‘zlariga ko‘ra, turistik jozibadorlikni kamaytirish maqsadida, xususan, tashrif buyuruvchilar uchun 30-dekabrdan 3-yanvarga qadar kafe va restoranlarni yopish bo‘yicha qaror yuborilgan.
Eslatib o‘tamiz, 2-dekabr kuni Sankt-Peterburg gubernatori Aleksandr Beglov shahar aholisidan odamlar ko‘p to‘planadigan joyga bormaslikni so‘rab, “koyka-o‘rinlar va shifokorlar cheksiz emas”ligini qo‘shimcha qilgan.
Rossiyada 2-dekabr kuni qatorasiga ikkinchi kun koronavirusdan o‘limlar soni yuqori bo‘ldi — bir sutkada 589 kishi vafot etdi. 25 345 kishiga COVID-19 tashxisi qo‘yildi. Bu bir kun avvalgi ko‘rsatkichdan 1057 kishiga ko‘p. Mamlakatda kasallanganlarning umumiy soni 2 347 401 nafarga yetdi. Yangi aniqlangan kasallanish holatlarining eng ko‘pi Moskva (5191 ta) va Sankt-Peterburg (3684 ta) shaharlarida qayd etilgan.
Izoh (0)