Япония прокуратураси собиқ бош вазир Синдзо Абэнинг котиблардан бирига нисбатан сайловчиларни сотиб олиш схемаси бўйича иш қўзғатди, деб хабар беради «Коммерсантъ». Kyodo агентлигининг маълум қилишича, Токио округ прокуратураси Япония собиқ бош вазири Синдзо Абэни 2015 йилдан 2019 йилга қадар Либерал-демократлар партияси тарафдорлари учун ўтказилган банкетларнинг молиялаштирилиши иши бўйича сўроқ қилиш ниятида.
NHK телеканалининг маълум қилишича, сўроқ шанба кунидан кейин бўлиб ўтиши мумкин. Ҳозирда собиқ бош вазирга сўроққа етиб келиш учун чақирув қоғози юборилган.
Синдзо Абэнинг котибларидан бирига қарши иш қўзғатилган, у Абенинг тарафдорлари учун уюштирилган базмларга кетган харажатларни яширишда гумон қилинмоқда. Буни сайлов қонунчилигига зид деб топишлари мумкин. Гумон қилинаётган котиб тадбирларни ташкил қилувчи гуруҳга раҳбарлик қилган.
Базмдаги ҳар бир инсондан 5 минг иена (тахминан 46 доллар) олинган. Бироқ базмлар уюштирилган меҳмонхоналар юқори классга оид бўлган ва киши бошига тўловлар одатдагидан анча баланд бўлган. 2015 йилдан бери уюштирилган базмларга 191 минг доллардан ортиқроқ маблағ сарфланган — бу сумма меҳмонлардан йиғилган пуллардан анча кўп. Меҳмонларнинг аксарияти Абе туғилиб ўсган Ямагути префектурасидаги сайлов участкаларидан бўлган. 2019 йилнинг ноябрида мухолиф партиялар базмларга сарфланган ва меҳмонлардан йиғилган сумма орасида фарқ борлигини маълум қилганди.
Эслатиб ўтамиз, Синдзо Абэ 2020 йилнинг августида истеъфога чиққанди. У ҳукумат бошқарувига илк бор 2006 йил келган, 2007 йил вазирларига билдирилган ишонч тушиб кетгани учун амалдан кетганди. Давлат бошқарувига иккинчи бор 2012 йил келган Абе Японияни бу сафар 7 йилдан ортиқ бошқарди. Иккинчи истеъфосини у саломатлигидаги муаммолар билан изоҳлаганди. Синдзо Абэ ҳукумат бошқарувида рекорд даражада узоқ ишлаган.
Изоҳ (0)