Ozarbayjon Mudofaa vazirligi birinchi marta Tog‘li Qorabog‘dagi urushda yuzaga kelgan harbiy yo‘qotishlar haqidagi ma’lumotlarni e’lon qildi. Bu haqda Meduza xabar berdi.
Vazirlik ma’lumotlariga ko‘ra, jangovar harakatlar davomida 2783 nafar harbiy xizmatchi halok bo‘lgan. Yana 100 nafardan ortiq harbiy xizmatchi bedarak yo‘qolgan deb hisoblanmoqda. Gospitallarda 1245 nafar harbiy davolanmoqda.
Armaniston Mudofaa vazirligi 17-noyabr kuni, harbiy harakatlar tugaganidan bir hafta o‘tgach urush davomida 2425 nafar armanistonlik harbiy xizmatchi halok bo‘lgani haqida ma’lum qilgan.
Urush boshlanganidan keyin o‘nlab tinch aholi vakillari ham halok bo‘lgani haqida xabar berilgan, biroq ikkala tomon ham ularning soniga aniqlik kiritmagan.
Tog‘li Qorabog‘dagi nizo Rossiya vositachiligida tayyorlangan o‘t ochishni to‘xtatish haqidagi kelishuv imzolanishi bilan yakunlandi. G‘alaba Ozarbayjonga nasib etdi — u avval tan olinmagan Tog‘li Qorabog‘ nazorati ostida bo‘lgan hududlarning qariyb yarmini qo‘lga kiritdi.
Izoh (0)