Koronavirusga chalingan ayrim bemorlarda tana harorati me’yordan past bo‘lmoqda. “RBK”ning yozishicha, bu haqda immunolog-allergolog Vladimir Bolibok “Lenta.ru”ga ma’lum qildi.
“Ayrimlarda 1,5—2 hafta davomida tana harorati yuqori bo‘ladi. Ayrimlarda esa umuman boshqacha holat: ular bir-ikki kun isitmalab, keyin harorati 35 daraja va undan pastga tushib ketmoqda”, — deydi Bolibok.
Uning so‘zlariga ko‘ra, past harorat COVID-19’ning yengil shakli bilan og‘rigan bemorlarda kuzatiladi. Buning sababi organizmdagi moddalar almashinuvi boshqaruvining buzilishi bo‘lishi mumkin.
Noyabr oyi o‘rtalarida Buyuk Britaniya va AQSh olimlari koronavirus infeksiyasining dastlabki bosqichida kuzatilgan simptomlarni ma’lum qilgan, ular orasida ishtaha yo‘qolishi, ko‘ngil aynishi, qayt qilish va oshqozon og‘rig‘i, ovqat hazm qilish muammolari kabilarni ko‘rsatgandi. Infeksiya yuqtirib olganning yana bir belgisi konyunktivit bo‘lishi mumkin, lekin bu simptom kamdan-kam — taxminan, 3 foiz hollarda uchraydi.
Bundan tashqari, parishonxotirlik va charchoq ham COVID-19 alomati bo‘lishi mumkin. Ikkinchisi taxminan har ikkinchi bemorda qayd etilmoqda.
Avvalroq koronavirusdan tuzalib chiqqanlar tishlari tushayotganidan shikoyat qilayotgani, virusni boshdan o‘tkazgan kishilar erta qarishi mumkinligi haqida xabar berilgan edi.
Izoh (0)