Davlat dasturida ko‘rsatilgan ayrim obyektlarning topshirish muddati belgilangan vaqtidan cho‘zilib ketmoqda. Bu bo‘yicha Senatning to‘qqizinchi yalpi majlisida Jizzax viloyati Kasaba uyushma tashkilotlari birlashmasi Kengashi raisi Nusuratulla Pardayev Sog‘liqni saqlash vazirligiga savol bergan.

Xususan, senator Jizzax viloyati Forish tumani tibbiyot birlashmasiga qarashli 60 o‘rinli tug‘ruq muassasasi qurilishi 2020-yilning sentabriga kelib yakunlanishi belgilangan bo‘lsa-da, haligacha u yerda qurilish ishlari davom etayotgani sababini so‘ragan.

Bunga javoban sog‘liqni saqlash vaziri o‘rinbosari Abdulla Azizov Forish tumanida 13 milliard so‘mga tug‘uruqxona qurib bitirilgani, biroq hozircha tibbiy va texnik uskunalar o‘rnatilmagani bois uni ishga tushirish imkoniyati bo‘lmaganligini bildirgan.

2021-yilning investitsiya dasturiga ko‘ra, tibbiy va texnik asbob-uskunalarni tender asosida sotib olib, muassasaga joylashtirib, 2021-yilgacha ishga tushirish ko‘zda tutilgan. Viloyat yig‘ilishida barcha sog‘liqni saqlash birlashmalari vakillari ishtirokida dastur qayta ko‘rib chiqilganida ham ushbu mavzu ko‘tarilgan.

Abdulla Azizov, Sog‘liqni saqlash vaziri o‘rinbosari

Eslatib o‘tamiz, 6-noyabr kuni Prezident Shavkat Mirziyoyev raisligida sog‘liqni saqlash sohasini isloh qilishga bag‘ishlangan videoselektor yig‘ilishida O‘zbekistonning har bir viloyatida “tibbiyot klasterlari” tashkil etilishi, O‘zbekistonda Sirdaryo misolida kafolatlangan tibbiy xizmatlar va dori vositalar paketlari ishlab chiqilishi, oilaviy shifokorga yordam beradigan “tibbiyot brigadalari” tashkil etilishi, chekka hududlardagi muassasalarga ishga kirgan tibbiyot xodimlariga 30 million so‘m miqdorida bir martalik pul mablag‘i berilishi ma’lum qilindi.