Prezident Shavkat Mirziyoyev 20-noyabr kuni “O‘zbekfilm” kinostudiyasida kinematografiya vakillari bilan bo‘lib o‘tgan uchrashuvda O‘zbekistondagi maktablarga taniqli o‘zbek kinoijodkorlarining nomlarini berishni tavsiya qildi.
“Prezidentimiz milliy kino san’atimiz fidoyilarini e’tirof etish maqsadida har bir hudud umumta’lim maktablariga Razzoq Hamroyev, Shukur Burhonov, Nabi Rahimov, Hamza Umarov, Lutfixonim Sarimsoqova kabi el sevgan ijodkorlar nomini berishni taklif qildi”, — deyiladi Prezident matbuot xizmati axborotida.
Eng sara o‘zbek filmlari 100 taligini tuzib, telekanallarda namoyish qilish bo‘yicha tavsiyalar berilgan. Bundan tashqari, jahon kinosanoati yutuqlarini o‘rganish va tatbiq etish, ijodkorlar malakasini oshirib borish, xususan, yoshlarni Rossiya davlat kinematografiya institutida o‘qitish bo‘yicha fikrlar bildirilgan.
Shuningdek, bolalar uchun kinostudiya tashkil qilish g‘oyasi ham ilgari surilgan.
Avvalroq O‘zbekistonda xizmat ko‘rsatgan artist Klara Jalilova 20-noyabr kuni 82 yoshida hayotdan ko‘z yumgani haqida xabar berilgandi.
Izoh (0)