Shavkat Mirziyoyev: Oilaviy shifokorga yordam beradigan “tibbiyot brigadalari” tashkil etiladi

Endilikda ilg‘or xorijiy tajriba asosida, umumiy amaliyot shifokorini haqiqiy oilaviy shifokorga aylantirib, ularga yordam beradigan o‘rta tibbiyot xodimlaridan iborat terapiya, pediatriya, akusherlik va patronaj bo‘yicha “tibbiyot brigadalari” tashkil etiladi. Bu haqda ayni paytda Shavkat Mirziyoyev raisligida o‘tkazilayotgan Sog‘liqni saqlash sohasini isloh qilishga bag‘ishlangan videoselektor yig‘ilishida so‘z bordi, deya xabar bermoqda “Daryo” muxbiri.

Davlat rahbari “tibbiyot brigadalari” o‘zlariga biriktirilgan mahallalarda oilalar kesimida “tibbiy xarita”ni shakllantirishi, unga oila a’zolari, ularning salomatligi haqidagi barcha ma’lumotlar kiritilib, aholi bilan manzilli ish yo‘lga qo‘yilishini ta’kidladi.

“‘Tibbiyot brigadalari’ mahalla va oilalar kesimida yuqumli bo‘lmagan kasalliklarni erta aniqlash bo‘yicha manzilli skrining tadbirlarini o‘tkazadi. Shuning uchun homiladorlar, 5 yoshgacha bo‘lgan bolalar, tug‘ish yoshidagi va 35 yoshdan oshgan ayollar, 40 yoshdan oshgan shaxslar doimiy nazoratga olinib, skrining tekshiruvlari amalga oshirilishi zarur. Bunda ortiqcha vazn, yuqori qon bosimi bor, qandli diabet, infarkt, insult, onkologik va boshqa ijtimoiy kasalliklarga moyil bo‘lganlarning alohida ro‘yxati yuritilib, ular individual patronajga olinadi.

Bundan buyon bepul tibbiy yordam uchun tor soha shifokorlari, tuman (shahar), viloyat va respublika shifoxonalariga yo‘llanmani oilaviy shifokor beradi. Shuningdek, bepul tarqatiladigan dorilarga retsept berish ham oilaviy shifokorlarga yuklatiladi. Mahalladagi aholining salomatlik ko‘rsatkichlari, hududdagi kasalliklarning o‘sishi, aholining shifoxonalarga yotishi va tez yordamga murojaatiga qarab oilaviy shifokorlar faoliyatiga baho beriladi. Qaysi oilaviy shifokor aholiga ko‘proq va sifatli xizmat ko‘rsatsa, shunga yarasha u o‘zining brigadasi bilan ko‘proq oylik oladi”, – dedi Shavkat Mirziyoyev.

O‘zbekiston Prezidenti yil yakuniga qadar Sirdaryo viloyati qishloq vrachlik punktlari va oilaviy poliklinikalarida jami 220 ta “tibbiyot brigadasi”ni tashkil etib, ularga 1 ming 200 nafar o‘rta tibbiyot xodimlarini biriktirish bo‘yicha topshiriq berdi.

“Kelasi yil 1-martga qadar ushbu ‘tibbiyot brigadalari’ ‘oilaviy tibbiyot’ bo‘yicha ilg‘or tajriba asosida o‘qitilsin. Boshqa viloyat hokimlari kelgusi yil 1-aprelga qadar ‘tibbiy xarita’ni shakllantirishni 26 ta tuman va shaharlarda ham yo‘lga qo‘yishi zarur. Buning uchun ushbu tuman va shahar hokimlari tibbiyot birlashmalari rahbarlari bilan birga, ikki oy muddatda aholini xatlovdan o‘tkazib, ularni tibbiyot muassasalariga biriktiradi.

Shuningdek, ‘tibbiyot brigadalari’ tomonidan aholining salomatlik holati baholanib, ularning elektron bazasi yaratiladi. Bunda, viloyat, tuman va shahar hokimlari mahalliy budjet hisobidan ‘tibbiyot brigadalari’ni planshet, mobil tibbiyot-diagnostika vositalari (tarozi, pulsoksimetr, tonometr, mobil EKG) bilan ta’minlaydi. Shu bilan birga, ushbu tumanlardagi qishloq vrachlik punktlari va poliklinikalari tezkor internetga ulanishi shart.

Bundan tashqari faoliyati qayta tashkil etiladigan patronaj hamshiralarini alohida o‘qitib, xavf guruhiga kiruvchi aholi bilan manzilli ishlashga o‘rgatish kerak. Qishloq vrachlik punkti va oilaviy poliklinikalar reytingini aniqlash tizimini joriy qilinadi. Bunda, reytingda yuqori o‘rinni egallagan 3 ta tibbiyot muassasasi mahalliy budjetdan mukofotlanadi”, – dedi davlat rahbari.