Давлат дастурида кўрсатилган айрим объектларнинг топшириш муддати белгиланган вақтидан чўзилиб кетмоқда. Бу бўйича Сенатнинг тўққизинчи ялпи мажлисида Жиззах вилояти Касаба уюшма ташкилотлари бирлашмаси Кенгаши раиси Нусуратулла Пардаев Соғлиқни сақлаш вазирлигига савол берган.
Хусусан, сенатор Жиззах вилояти Фориш тумани тиббиёт бирлашмасига қарашли 60 ўринли туғруқ муассасаси қурилиши 2020 йилнинг сентябрига келиб якунланиши белгиланган бўлса-да, ҳалигача у ерда қурилиш ишлари давом этаётгани сабабини сўраган.
Бунга жавобан соғлиқни сақлаш вазири ўринбосари Абдулла Азизов Фориш туманида 13 миллиард сўмга туғуруқхона қуриб битирилгани, бироқ ҳозирча тиббий ва техник ускуналар ўрнатилмагани боис уни ишга тушириш имконияти бўлмаганлигини билдирган.
2021 йилнинг инвестиция дастурига кўра, тиббий ва техник асбоб-ускуналарни тендер асосида сотиб олиб, муассасага жойлаштириб, 2021 йилгача ишга тушириш кўзда тутилган. Вилоят йиғилишида барча соғлиқни сақлаш бирлашмалари вакиллари иштирокида дастур қайта кўриб чиқилганида ҳам ушбу мавзу кўтарилган.Эслатиб ўтамиз, 6 ноябрь куни Президент Шавкат Мирзиёев раислигида соғлиқни сақлаш соҳасини ислоҳ қилишга бағишланган видеоселектор йиғилишида Ўзбекистоннинг ҳар бир вилоятида «тиббиёт кластерлари» ташкил этилиши, Ўзбекистонда Сирдарё мисолида кафолатланган тиббий хизматлар ва дори воситалар пакетлари ишлаб чиқилиши, оилавий шифокорга ёрдам берадиган «тиббиёт бригадалари» ташкил этилиши, чекка ҳудудлардаги муассасаларга ишга кирган тиббиёт ходимларига 30 миллион сўм миқдорида бир марталик пул маблағи берилиши маълум қилинди.Абдулла Азизов, Соғлиқни сақлаш вазири ўринбосари