O‘zbekistonda chekka hududlardagi muassasalarga ishga kirgan tibbiyot xodimlariga 30 mln so‘m miqdorida bir martalik pul mablag‘i beriladi

Ayni vaqtda Prezident Shavkat Mirziyoyev raisligida Sog‘liqni saqlash sohasini isloh qilishga bag‘ishlangan videoselektor yig‘ilishi davom etmoqda.

Selektor davomida Sog‘liqni saqlash tizimining birlamchi bo‘g‘inidagi davolash sifati haqida to‘xtalib o‘tildi. Buning uchun sharoit va kadrlar yetishmasligi aytib o‘tildi. Ta’kidlanishicha, xodimlarni rag‘batlantirish, malakasi va lavozimini oshirishga e’tibor yo‘q.

“Ko‘plab kasalliklar asosan kechqurun xuruj qilishini inobatga olib, qishloq vrachlik punktlari va oilaviy poliklinikalarda navbatchilik asosida tunu-kun ishlaydigan tartibni joriy qilish zarur. Qishloq vrachlik punktlari va oilaviy poliklinikalarda 20 mingdan ziyod vrachlik shtati mavjud bo‘lsada, unda 12 ming nafar shifokor ishlamoqda. Sababi, bugungi kunda umumiy amaliyot shifokori kasbi tibbiyot oliygohlari bitiruvchilari uchun jozibador emas” – dedi Shavkat Mirziyoyev.

Shu bois Prezident shifokorlarga munosib sharoitlar yaratish orqali ularni eng quyi bo‘g‘in – qishloq vrachlik punkti va oilaviy poliklinikalarga jalb qilish zarurligini ta’kidladi.

Buning uchun chekka hududlardagi birlamchi bo‘g‘in tibbiyot tizimi uchun “Qishloq shifokori” dasturi joriy qilinadi. Bu dasturga muvofiq chekka hududlardagi birlamchi bo‘g‘inga ishga kirgan tibbiyot xodimlariga 30 million so‘m miqdorida bir martalik pul mablag‘i beriladi, ular xizmat uyi bilan ta’minlanadi yoki ijara to‘lovi kompensatsiya qilinadi. Shu bilan birga ularga ikki yilda bir marotaba sihatgohga bepul yo‘llanma beriladi.

Shifokorlarga bo‘lgan ehtiyojlarni mahallalar kesimida aniqlab, tibbiyot oliy o‘quv yurtlarida kvotani oshirish, ipoteka asosida qurilayotgan uy-joylarni avvalo birlamchi bo‘g‘in shifokorlari uchun ajratish bo‘yicha ko‘rsatmalar berildi.

Selektorda aytilishicha, JSST tomonidan bitta amaliyot shifokoriga 1,5 ming nafar fuqaro biriktirilishi tavsiya etilgan. O‘zbekistondagi oilaviy poliklinikalarga o‘rtacha 25-30 ming nafar fuqaro to‘g‘ri kelishi lozim bo‘lsa-da, biroq amalda 40 ming nafardan 100 ming nafargacha fuqaro to‘g‘ri kelmoqda.

Ta’kidlanishicha aholi ehtiyojidan kelib chiqib, kelgusi yilda O‘zbekistonda 100 ta qishloq vrachlik punkti va 24 ta oilaviy poliklinika tashkil etiladi. Bunga qo‘shimcha ravishda keyingi 2 yilda yana 215 ta Qishloq vrachlik punkti va 61 ta oilaviy poliklinika faoliyati yo‘lga qo‘yiladi.