AQSh prezidenti Donald Tramp 2020-yilgi saylovlarda raqibi Jo Baydenning g‘alabasi tasdiqlansa, 2024-yil o‘tkaziladigan saylovlarda o‘z nomzodini ilgari surishi mumkin. Bu haqda New York Times’ga tayanib, “RIA Novosti” xabar berdi.
Ma’lumotlarga ko‘ra, bu shtatlar saylov natijalarini tasdiqlagandan keyin sodir bo‘lishi mumkin. Dastlabki hisob-kitoblarga ko‘ra, Bayden yetarlicha shtatda g‘alaba qozonib, prezidentlik uchun kerak bo‘lgan 270 ta ovozni to‘plagan.
Shu bilan birga, gazetaning yozishicha, Tramp o‘z mag‘lubiyatini tan olmayotgani va qator shtatlarda berilgan da’volariga qaramay, uning saylov natijalari ustidan shikoyat qilish bo‘yicha aniq rejasi yo‘q.
“U barchasi tugaganini biladi”, — deydi Trampning maslahatchilaridan biri.
Tramp maslahatchilari unga saylovlar natijasini o‘zgartirib yuboradigan darajada yetarlicha qonunbuzilishlarini topish imkoniyati kamligi to‘g‘risida ma’lumot bergan.
Donald Tramp o‘zining Twitter’dagi sahifasiga yozishicha, Michigan, Jorjiya va Pensilvaniya sudlari saylovlardagi keng ko‘lamli firibgarliklarni ko‘rib chiqmoqda. Shtatlar rasmiylari esa saylovlarda yirik qonunbuzarliklar qayd etilmaganini ma’lum qilgan.
Avvalroq Jo Bayden amaldagi prezident Donald Tramp saylovdagi mag‘lubiyatini tan olishdan bosh tortishini sharmandalik deb atagan edi.
Izoh (0)