Xitoy Jo Bayden va Kamala Xarrisni AQSh prezidentligi hamda vitse-prezidentligi saylovlarida erishgan g‘alabasi bilan tabrikladi. Bu haqda Xitoy TIVning rasmiy vakili Van Venbinga tayanib, “RBK” xabar berdi. U tabrik maktubi aynan kim tomonidan imzolanganiga aniqlik kiritmagan.
“Biz AQShdagi prezidentlik saylovlarini Qo‘shma Shtatlarning ichidan turib ham, xalqaro hamjamiyat tomonidan ham kuzatib bormoqdamiz. Amerika xalqining tanlovini hurmat qilamiz va Bayden hamda Xarrisni tabriklaymiz”, — deydi Venbin.
Tramp saylov natijalari ustidan sudga shikoyat qilishni boshlagani sabab Xitoy hozirga qadar holatga izoh bermay kelayotgan davlatlardan biri edi.
“Biz AQShdagi prezidentlik saylovlari natijasi Amerika qonunlari va protseduralari orqali aniqlanishini tushunamiz”, — deydi Xitoy TIV vakili.
Mazkur bayonot AQShning amaldagi prezidenti Donald Tramp 2021-yil 11-yanvardan boshlab Xitoyning harbiy sanoat komplekslariga bog‘liq kompaniyalarning qimmatli qog‘ozlarini amerikalik jismoniy va yuridik shaxslar tomonidan xarid qilinishini taqiqlovchi qarorni imzolaganidan so‘ng bildirilgan.
Trampning fikricha, Amerika investitsiyalari Xitoyga o‘zining mudofaa imkoniyatlarini mustahkamlab olishga va “to‘g‘ridan to‘g‘ri AQShga xavf tug‘dirishga” yordam beradi.
Avvalroq Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish, Janubiy Koreya prezidenti Mun Chje In Jo Baydenni AQSh prezidentligi saylovidagi g‘alaba bilan tabriklagan edi. Rossiya prezidentining matbuot kotibi Dmirtiy Peskov esa Putin “saylov natijalari rasman e’lon qilinganidan keyin” tabriklashini bildirgan.
Mavzuga doir:
- Donald Tramp Jo Baydenga hokimiyatni topshirishdan bosh tortdi. Ammo demokratning jamoasi hokimiyat tranzitiga tayyorlanishni boshladi
- Saylovlardagi mag‘lubiyatdan so‘ng Trampga nima bo‘ladi? U Oq uydan to‘g‘ri qamoqqa ravona bo‘lishi rostmi? O‘zini o‘zi afv etishga ulguradimi? Uning kelajagiga oid savollarga javoblar
Izoh (0)