Armaniston hukumati uchta davlat rahbarlarining Tog‘li Qorabog‘da o‘t ochishni to‘xtatish haqidagi bayonoti Tog‘li Qorabog‘ masalasining keng qamrovli yechimi deb hisoblamaydi. Bu haqda Armaniston tashqi ishlar vaziri Zograb Mnatsakanyan Rossiya tashqi ishlar vaziri Sergey Lavrov, Fransiya tashqi ishlar vaziri Jan-Iv Le Drian va AQSh davlat kotibi o‘rinbosari Stiven Bigan bilan telefon orqali muzokaralar chog‘ida aytib o‘tdi, deb yozadi “RBK”.
“Yuqorida tilga olingan bayonot o‘t ochishni to‘xtatish rejimini o‘rnatishga va Arsaxga tinchlikparvarlarni joylashtirishga qaratilgan, u Tog‘li Qorabog‘ masalasining keng qamrovli yechimi bo‘la olmaydi”, — dedi vazir.
Avvalroq Armaniston bosh vaziri Nikol Pashinyan shunga o‘xshash fikrni urushdagi mag‘lubiyat sabablarini tushuntirib, xalqqa qilgan navbatdagi murojaatida bildirgan edi.
“Ushbu hujjatda masalaning sermazmun yechimi ko‘zda tutilmagan, balki shunchaki jangovar harakatlarni to‘xtatish nazarda tutilgan. Qorabog‘ masalasi hamon hal qilinmagan holda qolmoqda”, — dedi Pashinyan.
Ayni vaqtda Bokudan bunga qarama-qarshi ma’nodagi bayonotlar yangramoqda. Ozarbayjonning Rossiyadagi elchisi Po‘lat Bulbulo‘g‘li “RBK”ga bergan intervyusida o‘t ochishni to‘xtatish haqidagi bayonotni muammoning yechimi deb baholagandi.
“Status-kvo (joriy vaziyat) yo‘q, mavjud emas va boshqa hech qachon bo‘lmaydi. Bu yarashuv emas, bu Qorabog‘ masalasining yechimi. Siz ta’kidlab o‘tgan gap mutlaqo to‘g‘ri — Boku qarshisida boshqa muammo yo‘q. Muammo endi yo‘q, u hal qilindi”, — deya qayd etdi elchi.
Ozarbayjon prezidenti Ilhom Aliyev vatandoshlarini urushdagi g‘alaba bilan qutladi va Tog‘li Qorabog‘ning alohida maqomi g‘oyasi yangi kelishuvlardan keyin boshqa muhokama qilinmasligini aytdi.
Rossiya tashqi ishlar vaziri Sergey Lavrov Tog‘li Qorabog‘ hududining maqomi ushbu mintaqadagi barcha toifadagi aholining huquqlari tushunarli bo‘lganidan keyin aniqlanishini aytdi.
9-noyabr kuni kechqurun Armaniston, Ozarbayjon va Rossiya rahbarlari tinchlik bitimini imzolagani ma’lum bo‘ldi. Unga muvofiq, Armaniston Tog‘li Qorabog‘ hududlarining katta qismini va 1990-yildan beri Yerevan tasarrufida qolgan hududlarni Ozarbayjonga topshiradi. Armaniston Qurolli kuchlari o‘z pozitsiyalaridan olib chiqilmoqda, mintaqaga 2 mingta rus tinchlikparvari texnika bilan olib kelinmoqda. Armanistonga Qorabog‘ga transport yo‘lagi yaratilishi kafolatlanadi, shu bilan bir vaqtda Ozarbayjondan Naxichevan eksklavigacha transport yo‘lagi yaratiladi.
Kreml prezident Aliyevning ushbu kelishuv Armanistonning “taslim bo‘lishi” haqidagi ilgari aytilgan so‘zlariga qo‘shilmadi. Rossiya prezidenti matbuot kotibi Dmitriy Peskov ushbu hujjat qon to‘kilishiga chek qo‘yib, “ikki xalqning, Armaniston va Ozarbayjonning g‘alabasi” bo‘lganini aytdi.
Izoh (0)