Shvetsiya COVID-19’ning ikkinchi to‘lqini haqidagi prognozi noto‘g‘ri bo‘lib chiqqanini tan oldi

Shvetsiya Jamoatchilik sog‘lig‘ini saqlash agentligi mamlakatda kuzda koronavirusning ikkinchi to‘lqini borasidagi prognozi xato bo‘lib chiqqanini tan oldi. Bu haqda “RBK” xabar bermoqda.

Shvetsiya bosh epidemiologi Anders Tegnell kuzda mamlakatdagi epidemiologik vaziyat jamoaviy immunitet ishlab chiqarilishi hisobiga karantin joriy qilgan Finlyandiya va Norvegiya kabi boshqa Skandinaviya davlatlariga nisbatan yaxshiroq bo‘ladi deb o‘ylagan edi.

Aslida esa COVID-19 bilan kasalxonaga yotqizilayotganlar soni hozirda Shvetsiyada Yevropaning boshqa har qanday mamlakatiga nisbatan tezroq o‘smoqda. Stokgolmda esa infeksiyaga topshirilayotgan har beshinchi test ijobiy chiqmoqda. Hukumat tomonidan tanlangan COVID-19’ga qarshi kurash strategiyasidan norozi bo‘lgan virusolog Lena Eynxorn fikricha, virusga shvedcha yondashuv muvaffaqiyatsizlikka uchradi.

“To‘rt kun avval bizda koronavirusga chalinish holatlari aholi boshiga Finlyandiyaga nisbatan 8 marta va Norvegiyaga nisbatan 3,5 marta ko‘proq qayd etilgandi. Ammo bizda immunitet paydo bo‘lishi kerakligi hisobiga ularda kuzda vaziyat yomonroq bo‘lishi kerak edi”, — dedi Eynxorn.

Ayni paytgacha Shvetsiyada 171 365 kishi koronavirusga chalingan, 6122 kishi vafot etgan. 5-noyabr kuni mamlakatda epidemiya boshidan buyon sutkalik antirekord qayd etildi — bir kecha-kunduzda 4744 kishi kasallikka chalindi. Finlyandiyada COVID-19 bemorlari soni, Jons Hopkins universiteti ma’lumotlariga qaraganda, hozirda 18,5 ming kishidan oshadi, Norvegiyada esa 27,2 mingdan ortiq holat aniqlangan.

Bahorda Shvetsiya hukumati jamoaviy immunitet ishlab chiqarilishi natijasida koronavirus tarqalishi o‘z-o‘zidan to‘xtashiga umid qilib, qat’iy cheklovlar kiritishdan bosh tortgan edi.

Ammo iyunda bosh epidemiolog Tegnell mamlakatning COVID-19’ga nisbatan strategiyasi favqulodda ko‘p o‘limlarga olib kelganini tan olgandi. Iyulda Shvetsiyada hukumatning koronavirusga qarshi kurashga yondashuvini tekshirish uchun komissiya tuzilgandi.

Eslatib o‘tamiz, pandemiya boshidan buyon dunyo bo‘yicha 52 milliondan ortiq odam koronavirusga chalindi.