Demokratik partiyadan nomzod Jo Bayden amaldagi prezident Donald Trampning saylovdagi mag‘lubiyatini tan olishdan bosh tortishini sharmandalik deb atadi. Bu haqda u Delaverda so‘zlagan nutqida aytib o‘tdi, deb yozadi “RBK”.
“Men buni sharmandalik deb hisoblayman, to‘g‘risini aytsam… O‘ylaymanki, oxir-oqibat bu (Baydenning saylovdagi g‘alabasi) 20-yanvarda (inauguratsiya kuni) amalga oshadi”, — dedi u.
Avvalroq AQSh ommaviy axborot vositalari, xususan, Associated Press, CNN, The New York Times, ABC News, Fox News va boshqalar 7-noyabr, shanba kuni Jo Baydenni AQShning saylangan prezidenti deb e’lon qildi. OAV hisob-kitoblariga ko‘ra, prezidentlikka nomzod – Demokratik partiyadan ko‘rsatilgan sobiq vitse-prezident Jo Bayden Pensilvaniya shtatida g‘alaba qozongan va prezident saylovida g‘olib chiqish uchun tanlovchilarning kamida 270 ta ovozi kerak bo‘lgan holatda 273 ta ovozni qo‘lga kiritgan.
AQShning amaldagi prezidenti Donald Tramp Amerikaning yirik ommaviy axborot vositalari Jo Baydenning saylovlarda g‘olib chiqqanligini e’lon qilganidan keyin hozircha mag‘lubiyatini tan olishdan bosh tortdi.
Shunga qaramay, Bayden allaqachon davlatning yangi rahbari sifatida xalqqa murojaat qildi. Ko‘plab mamlakatlarning rahbarlari uni allaqachon AQSh prezidenti etib saylangani bilan tabrikladi.
Mavzuga doir: