АҚШ президенти Дональд Трамп 2020 йилги сайловларда рақиби Жо Байденнинг ғалабаси тасдиқланса, 2024 йил ўтказиладиган сайловларда ўз номзодини илгари суриши мумкин. Бу ҳақда New York Times’га таяниб, «РИА Новости» хабар берди.
Маълумотларга кўра, бу штатлар сайлов натижаларини тасдиқлагандан кейин содир бўлиши мумкин. Дастлабки ҳисоб-китобларга кўра, Байден етарлича штатда ғалаба қозониб, президентлик учун керак бўлган 270 та овозни тўплаган.
Шу билан бирга, газетанинг ёзишича, Трамп ўз мағлубиятини тан олмаётгани ва қатор штатларда берилган даъволарига қарамай, унинг сайлов натижалари устидан шикоят қилиш бўйича аниқ режаси йўқ.
«У барчаси тугаганини билади», — дейди Трампнинг маслаҳатчиларидан бири.
Трамп маслаҳатчилари унга сайловлар натижасини ўзгартириб юборадиган даражада етарлича қонунбузилишларини топиш имконияти камлиги тўғрисида маълумот берган.
Дональд Трамп ўзининг Twitter’даги саҳифасига ёзишича, Мичиган, Жоржия ва Пенсильвания судлари сайловлардаги кенг кўламли фирибгарликларни кўриб чиқмоқда. Штатлар расмийлари эса сайловларда йирик қонунбузарликлар қайд этилмаганини маълум қилган.
Аввалроқ Жо Байден амалдаги президент Дональд Трамп сайловдаги мағлубиятини тан олишдан бош тортишини шармандалик деб атаган эди.
Изоҳ (0)