Qozog‘istonga yog‘gan qor sabab Nur-Sultonda bir kunda — 100 ta, Olmaotada esa bir kechada 39 ta YTH sodir bo‘ldi

Qozog‘iston poytaxti Nur-Sultonda kuchli qor yog‘ishi oqibatida yo‘l-transport hodisalari soni ortib ketdi. Politsiya avtomobil egalariga iltimos bilan murojaat qildi, deb xabar beradi Tengrinews.

“Kuchli qor yog‘ishi va muzlamalar yuzaga kelgani sabab kommunal xizmatlarning maxsus texnikalari maksimal darajada shahar ko‘chalarini tozalashga jalb etilgan. Poytaxt aholisidan vaziyatga tushunib, texnikalar kolonnasiga hamrohlik qilayotgan politsiya patrullari talablarini bajarishlarini, yo‘lning harakat qismiga transport vositalarini qo‘yib ketib, tozalaydigan texnikalarga xalaqit qilmaslikni, shuningdek, maxsus texnikalar yo‘lida qator bo‘lib turmaslikni iltimos qilamiz”, — deyiladi politsiya xabarida.

Huquq-tartibot idoralarining ma’lumotlariga ko‘ra, kun davomida shahar hududi bo‘ylab yuzta YTH qayd etilgan, bunda o‘sish ko‘rsatkichi 40 foizni tashkil etmoqda.

Politsiya departamentining aniqlik kiritishicha, poytaxt yo‘llaridagi avariyalar oqibatida hech kimga jarohat yetmagan.

Olmaota shahri politsiya departamentining ma’lum qilishicha, shaharga qor yog‘gani sabab bir kechaning o‘zida 39 ta avariya sodir bo‘lgan. Olingan jarohatlar oqibatida ikki kishi vafot etgan.

Shakar hokimligining ma’lumotlariga ko‘ra, o‘tgan kecha Olmaotaga 4-7 santimetr, tog‘li hududlarga 10-12 santimetr  qalinlikda qor yog‘gan.

Eslatib o‘tamiz, 12-noyabr kuni Qamchiq dovonida ham qor yog‘ib, kuchli tuman tushishi kuzatilgandi.