“Hatto tergov ham 23:00 dan keyin o‘tkazilmaydi”. Nig‘matilla Yo‘ldoshev Ta’lim inspeksiyasi yarim tungacha testlar o‘tkazganini tanqid qildi

Avvalroq ta’lim sifatini nazorat qilish inspeksiyasi xodimi nostrifikatsiya uchun 6,5 ming dollar pora olgani haqida xabar berilgan edi. Bu haqda O‘zbekiston bosh prokurori Nig‘matilla Yo‘ldoshev raisligida korrupsiya holatlari kuzatilayotgan sohalar hamda vazirlik va idoralarda buning sabab va shart-sharoitlariga bag‘ishlangan idoralararo yig‘ilishda gapirilgan.

Yo‘ldoshev mazkur jinoyat ishi tergovi davomida nostrifikatsiya va malaka toifasini berish jarayonida korrupsiyaga imkon beradigan ko‘plab omillar aniqlanganini aytdi. Jumladan, nostrifikatsiya hujjatlarini ekspert komissiyasida ko‘rib chiqish va mutaxassislik bo‘yicha test sinovlarini o‘tkazish vazifasi Ta’lim sifatini nazorat qilish inspeksiyasiga yuklatilgani oqibatida amalda nazorat qiladigan organning o‘zi mavjud emas.

Inspeksiyada test sinovlari o‘tkaziladigan dastur hech qayerda ekspertizadan o‘tkazilmagan va sertifikatga ham ega emasligi bildirildi. Dasturga administrator tomonidan biror to‘siqsiz aralashish va undagi ma’lumotlarni bemalol o‘zgartirish imkoniyati mavjud. Bu esa tashkilot mutaxassislariga manfaatdorlik evaziga test sinovlarini o‘zgartirish imkonini beradi. Shu jihatdan so‘nggi 2 yilda 198 nafar test topshirganlarning ballari 5 balldan 43 ballgacha sun’iy ravishda oshirib qo‘yilgan.

So‘nggi 2 yilda test sinovidan o‘tkazilgan 23 mingdan ortiq shaxsning 4,5 ming nafari yoki qariyb 20 foizining test sinovlari tungi vaqtda, ya’ni 18:00 dan 00:00 gacha bo‘lgan. Hattoki tergov harakatlari ham 23:00 dan keyin o‘tkazilmaydi. Bu ham yetmaganidek, sinovdan o‘ta olmagan talabgor budjetga to‘lovni amalga oshirgan holda qayta imtihon topshirishi belgilangan bo‘lsa-da, testdan yiqilgan 503 nafar shaxs shu kunning o‘zida 2 martadan 8 martagacha biror-bir to‘siqsiz test topshirgan. Oqibatda budjetga jami 204 million so‘mlik to‘lovlar undirilmasdan qolgan. Qisqa muddatda 3 nafar, ya’ni fuqaro Kamolov va Sa’dullayevning Tojikiston, Jamolovaning esa Qozog‘iston oliy o‘quv yurtlarini bitirganlik haqidagi soxta diplomlari ham nostrifikatsiya qilingan. Tergovda, albatta, barcha holatlar sabablariga, jinoyatga daxldor shaxslarga aniqlik kiritiladi.

Nig‘matilla Yo‘ldoshev, bosh prokuror

“Inspeksiya boshlig‘i Ulug‘bek Negmatovich bu holatlarni qanday izohlar ekan? Yoki uning o‘zi ham bundan manfaatdormi, degan savollar tug‘ilishi tabiiy. Shu bois u kishidan batafsil tushuntirish berishni so‘rab qolamiz”,— deydi bosh prokuror.

Avvalroq Yo‘ldoshev o‘tgan ikki yilda moliya organlarining 41 nafar xodimi korrupsiya holatlari uchun jinoiy javobgarlikka tortilgani, “Xalq banki” sobiq rahbari tuzgan jinoiy guruh aniqlangani, Arnasoy, Yunusobod, Buvayda hokimlari o‘rinbosarlari yer ajratib berish evaziga pora olgani va To‘raqo‘rg‘on bandlikka ko‘maklashish markazi direktori pandemiya davrida 325,5 million so‘m mablag‘ni talon-toroj qilgani haqida ma’lum qilgandi.