Bosh prokuror Nig‘matilla Yo‘ldoshev budjet mablag‘larining ratsional taqsimlanishi va maqsadli ishlatilishi yuzasidan davlat nazoratiga mas’ul moliya organlarida yuklatilgan vazifalar talab darajasida bajarilmayotganini tanqid qildi, deb xabar beradi “Daryo” muxbiri.

Yig‘ilishda ta’kidlanishicha, moliya organlarining budjet sarfini to‘laqonli nazorat qilishiga tizimdagi korrupsiya holatlari ham to‘sqinlik qilmoqda.

2018-2019 yillarda huquqni muhofaza qiluvchi organlar tashabbusi bilan o‘tkazilgan tekshirishlarda 131 milliard so‘mlik talon-torojliklar fosh etilgan bir paytda davlat moliyaviy nazorat idoralari tashabbusi bilan 79,4 milliard so‘mlik yoki qariyb ikki baravar kam talon-toroj qilish holatlari aniqlangan. Moliya organlarining budjet sarfini to‘laqonli nazorat qilishiga, davlat xaridi bilan bog‘liq yirik talon-torojliklarni aniqlashiga nima to‘sqinlik qiladi? Bu aslida korrupsiya emasmi?

Nig‘matilla Yo‘ldoshev, bosh prokuror

“O‘tgan ikki yilda moliya organlarining 41 nafar xodimi korrupsiya holatlari uchun jinoiy javobgarlikka tortilgan”, — deydi bosh prokuror. Ushbu idoralarda, asosan, aniqlangan qonun buzilishi holatlarini yashirish, tekshirish o‘tkazmaslik, budjetdan ajratilgan mablag‘ni o‘z vaqtida o‘tkazib bermaslik, shtat birliklarini belgilash jarayonida suiiste’molchiliklar ko‘plab sodir etilgan.

Masalan, Davlat moliyaviy nazorati departamentining Surxondaryo viloyati boshqarmasi bosh nazoratchi-taftishchisi Nurmanov Uzun qurilish kollejida aniqlangan 265 million so‘mlik kamomadni yashirish evaziga kollej bosh hisobchisi Allanazarovdan 2000 dollar va 500 ming so‘m olganligi uchun sud hukmi bilan jazoga tortilgan.

Olmaliq shahar moliya bo‘limining boshlig‘i birinchi o‘rinbosari Erqulov tug‘ruq kompleksi bosh shifokori To‘rayevadan kompleksga qo‘shimcha 10 ta shtat birligi ajratish masalasini hal qilib berish evaziga 800 dollar olganligi uchun sud hukmi bilan jazoga tortilgan.

Eng asosiy va tashvishlisi, budjet nazoratiga mas’ul bo‘lgan ushbu vazirlik tizimining (Moliya vazirligi nazarda tutilgan — tahrir.) o‘zida ham budjet mablag‘lari tap tortmasdan ochiqdan ochiq talon-toroj qilinmoqda. E’tibor bering, g‘aznachilikning Andijon viloyati boshqarmasi mansabdor shaxslari xodimlarga ish haqi berish vaji bilan bankdan 1 milliard so‘m ortiqcha pul olishga erishib, uni shaxsiy ehtiyojlari uchun sarflab yuborganligi yuzasidan jinoyat ishi qo‘zg‘atilib, tergov o‘tkazilmoqda.

Nig‘matilla Yo‘ldoshev, bosh prokuror