7-noyabr kuni Bosh prokuraturada tashkil etilgan korrupsiya masalalariga oid idoralararo yig‘ilishda bosh prokuror Nig‘matilla Yo‘ldoshev “Yangiobod ixtisoslashgan bozori” direktori qator korrupsiyaviy jinoyatlarni sodir etishda ayblanganini ma’lum qildi.
Ta’kidlanishicha, ayni paytda bozorlarda tanish-bilishchilik, turli suiiste’molchilik va talon-torojliklar avj olmoqda. “Ta’bir joiz bo‘lsa, bu fayzli maskanlar korrupsiya o‘chog‘iga aylanib bormoqda”,—deydi Yo‘ldoshev. Xususan, poytaxtdagi “Yangiobod ixtisoslashgan bozori” direktori Ismoilov qator korrupsiyaviy jinoyatlarni sodir etishda ayblanib, unga nisbatan tergov o‘tkazilmoqda.
U muqaddam savdo va bozor sohalarida ishlab, bir necha marotaba sudlangan, so‘nggi bor “Sergeli dehqon bozori” direktori lavozimida ishlaganda sodir etgan suiiste’molchiliklari va talon-torojliklar uchun 2016-yilda sud hukmi bilan jazolangan. Ismoilov 2019-yil fevral oyida yana “Sergeli dehqon bozori” direktori lavozimiga tayinlanib, o‘sha yilning aprel oyidan esa “Yangiobod ixtisoslashgan bozori” direktorligiga o‘tgan.
“Bu bozorda ham eski qilig‘ini davom ettirgan Ismoilov, bozorga shaxsiy mulki sifatida qarab nazoratchilar va tadbirkorlarga o‘lponlar solgan. Tushumlarni cho‘ntakka urish, bozor mulkini talon-toroj qilish bilan shug‘ullanib kelgan, — deydi Nig‘matilla Yo‘ldoshev.
Ismoilov atrofiga o‘ziga xayrixoh shaxslarni to‘plagan. Jumladan, avval “Sergeli dehqon bozori”da birga ishlagan Yo‘lbarsovni o‘ziga o‘rinbosar, Timofeevni bosh hisobchi, kuyovi Jahonovni xavfsizlik bo‘limi rahbari etib tayinlagan. Qisqa muddatda Ismoilov 2,7 milliard so‘mlik tushum pullarini o‘marganligi, 919 million so‘m soliqdan bo‘yin tovlaganligi, bozorda 124 ta noqonuniy qurilmalar qurdirganligi aniqlangan. Tergovda ushbu raqamlar kun sayin ortib borayotgani aytildi.Talon-toroj qilgan pullardan qariyb 740 million so‘mini Ismoilov legallashtirgan, jumladan, 340 million so‘mga onasi Asqarova nomiga Sergeli tumanidan 5 xonali kvartira, xotini Nizomova nomiga 200 million so‘mga Trailblazer avtomashinasini sotib olgan. Bu hali aniqlangan holatlargina ekanligi qayd etildi.
“Bunday talon-torojlik oqibatida bozor o‘ta ayanchli holatga kelib qolgan”, — dedi bosh prokuror.
Xususan, bugungi kunda xodimlarning ish haqidan 95 million so‘m, soliqdan 920 million so‘m, kommunal to‘lovlardan 978 million so‘m, boshqa tashkilotlar oldida 240 million so‘m, jami 2,2 milliard so‘m asosiy hamda 2,9 milliard so‘m penya to‘lovlaridan qarzdorlik vujudga kelgan.Bozorda infratuzilma, tartib-intizom, tozalik, yong‘in xavfsizligi masalalari abgor ahvolda. Bosh prokuror bunday ayanchli holat bozor rahbariyati va boshqa mutasaddilarni tashvishga solmaganini bildirib o‘tdi.
“Bu ham yetmaganidek, ko‘rgan bilan ko‘z to‘ymas, tek turishga nafs qo‘ymas, deganlaridek, Ismoilov boshqa bozorlarga ham ko‘z olaytirgan. Ahamiyat bering, ayrim rahnamolarining ko‘magida “Sergeli dehqon bozori”ga o‘g‘li Bekjon Ismoilovni direktor, “Farhod dehqon bozori”ga yana bir o‘g‘li Jahongir Ismoilovni direktorning birinchi o‘rinbosari, “Aviasozlar dehqon bozori”ga muqaddam o‘zi bilan birga sudlangan Shavkat Quvonovning direktor etib tayinlanishiga ham erishgan. Bir so‘z bilan aytganda, ushbu bozorlarga ham rasmiy rahbarlik qilib kelgan”, — dedi Nig‘matilla Yo‘ldoshev.
Bosh prokuror holatni izohlar ekan, “Nahotki bu holatdan Toshkent shahar hokimligi va Munitsipial aktivlarni boshqarish markazi rahbari Muzaffar Abdurahmonovning xabari bo‘lmasa, yoki qayta qayta sudlangan, borgan joyidan o‘ziga pul o‘marishni kasb qilgan bu shaxsni yana rahbarlikka tayinlashdan u manfaatdormi? Ismoilov qamoqqa olingandan so‘ng uning o‘rniga hamtovog‘i Yo‘lbarsov tayinlanganligiga nima deysiz?”, — deb qo‘shimcha qilgan. Yo‘ldoshev tergov davomida ushbu savollarning barchasiga javob topilishini aytgan.
Avvalroq “Ark buloq” bojxona posti sobiq boshlig‘i olgan poralarini Bo‘stonliqdan dala hovli, Tashkent City’dan 2 ta uy, bitta noturar joy va Captiva xarid qilishga sarflagani ma’lum bo‘lgandi.
Mavzuga doir:
Izoh (0)