«Ҳатто тергов ҳам 23:00 дан кейин ўтказилмайди». Ниғматилла Йўлдошев Таълим инспекцияси ярим тунгача тестлар ўтказганини танқид қилди

Аввалроқ таълим сифатини назорат қилиш инспекцияси ходими нострификация учун 6,5 минг доллар пора олгани ҳақида хабар берилган эди. Бу ҳақда Ўзбекистон бош прокурори Ниғматилла Йўлдошев раислигида коррупция ҳолатлари кузатилаётган соҳалар ҳамда вазирлик ва идораларда бунинг сабаб ва шарт-шароитларига бағишланган идоралараро йиғилишда гапирилган.

Йўлдошев мазкур жиноят иши тергови давомида нострификация ва малака тоифасини бериш жараёнида коррупцияга имкон берадиган кўплаб омиллар аниқланганини айтди. Жумладан, нострификация ҳужжатларини эксперт комиссиясида кўриб чиқиш ва мутахассислик бўйича тест синовларини ўтказиш вазифаси Таълим сифатини назорат қилиш инспекциясига юклатилгани оқибатида амалда назорат қиладиган органнинг ўзи мавжуд эмас.

Инспекцияда тест синовлари ўтказиладиган дастур ҳеч қаерда экспертизадан ўтказилмаган ва сертификатга ҳам эга эмаслиги билдирилди. Дастурга администратор томонидан бирор тўсиқсиз аралашиш ва ундаги маълумотларни бемалол ўзгартириш имконияти мавжуд. Бу эса ташкилот мутахассисларига манфаатдорлик эвазига тест синовларини ўзгартириш имконини беради. Шу жиҳатдан сўнгги 2 йилда 198 нафар тест топширганларнинг баллари 5 баллдан 43 баллгача сунъий равишда ошириб қўйилган.

Сўнгги 2 йилда тест синовидан ўтказилган 23 мингдан ортиқ шахснинг 4,5 минг нафари ёки қарийб 20 фоизининг тест синовлари тунги вақтда, яъни 18:00 дан 00:00 гача бўлган. Ҳаттоки тергов ҳаракатлари ҳам 23:00 дан кейин ўтказилмайди. Бу ҳам етмаганидек, синовдан ўта олмаган талабгор бюджетга тўловни амалга оширган ҳолда қайта имтиҳон топшириши белгиланган бўлса-да, тестдан йиқилган 503 нафар шахс шу куннинг ўзида 2 мартадан 8 мартагача бирор-бир тўсиқсиз тест топширган. Оқибатда бюджетга жами 204 миллион сўмлик тўловлар ундирилмасдан қолган. Қисқа муддатда 3 нафар, яъни фуқаро Камолов ва Саъдуллаевнинг Тожикистон, Жамолованинг эса Қозоғистон олий ўқув юртларини битирганлик ҳақидаги сохта дипломлари ҳам нострификация қилинган. Терговда, албатта, барча ҳолатлар сабабларига, жиноятга дахлдор шахсларга аниқлик киритилади.

Ниғматилла Йўлдошев, бош прокурор

«Инспекция бошлиғи Улуғбек Негматович бу ҳолатларни қандай изоҳлар экан? Ёки унинг ўзи ҳам бундан манфаатдорми, деган саволлар туғилиши табиий. Шу боис у кишидан батафсил тушунтириш беришни сўраб қоламиз»,— дейди бош прокурор.

Аввалроқ Йўлдошев ўтган икки йилда молия органларининг 41 нафар ходими коррупция ҳолатлари учун жиноий жавобгарликка тортилгани, «Халқ банки» собиқ раҳбари тузган жиноий гуруҳ аниқлангани, Арнасой, Юнусобод, Бувайда ҳокимлари ўринбосарлари ер ажратиб бериш эвазига пора олгани ва Тўрақўрғон бандликка кўмаклашиш маркази директори пандемия даврида 325,5 миллион сўм маблағни талон-торож қилгани ҳақида маълум қилганди.