UNG Petro kompaniyasi 2020-yilning 10-noyabridan boshlab avtomobilga yonilg‘i quyish shoxobchalarida import qilinadigan Ai-95 markali benzinning bir litri narxini 6600 so‘mdan 6300 so‘mga tushiradi. Bu haqda kompaniya tomonidan ma’lum qilindi.
“Bizning kompaniyamiz bozor munosabatlari mexanizmiga qat’iy amal qiladi va mahsulot tannarxi pasayganda, albatta, uning sotish narxi ham pasayadi. Bunday amaliyot davom ettiriladi”, — deya ma’lum qilgan UNG Petro direktori Mirzohid Musayev.
Biroq “Xabar.uz” nashrining yozishicha, 8-noyabrdan boshlab O‘zbekiston bo‘ylab Ai-80 markali benzinning narxi oshdi.
Qayd etilishicha, shu vaqtgacha Toshkent shahridagi ayrim AYoQShlarda Ai-80 markali benzin 4100 so‘mdan 4500 so‘mgacha sotilayotgan edi. Hozirda ushbu markadagi benzin turli yonilg‘i quyish shoxobchalarida 4500 so‘mdan 4800 so‘mgacha bo‘lgan narxlarda sotilmoqda.
Ijtimoiy tarmoqlarda ham Toshkent shahridagi AYoQShlarda Ai-80 markali benzin 4800 so‘mdan sotilayotgani aks etgan suratlar tarqaldi.
Telegram’dagi “bakiroo” kanalining yozishicha, keyingi bir oy davomida jahon bozorida neft narxi o‘rtacha 10 foizga arzonlagan. Dunyoda neft narxi tushishi bilan O‘zbekistonda benzin narxi oshishi an’anaga aylangan.
“O‘zbekistonda monopolistlar tomonidan shakllangan an’anaga binoan eng arzon, eng sifatsiz, lekin asosan qora xalq iste’molidagi Ai-80 benzin chakana narxlari 7-8 foizga yoki 300-400 so‘mgacha ko‘tarilgan. Bugundan boshlab yonilg‘i quyish shoxobchalari Ai-80 benzinni 4600-4800 so‘mlik narxlarda sotmoqdalar”, — deb yozgan kanal muallifi.
Avvalroq “O‘zbekneftgaz” AJga qarashli yoqilg‘i quyish shoxobchalarida 1-noyabrdan boshlab import dizel yoqilg‘isining narxi 6500 so‘mdan 6000 so‘mga arzonlashtirilishi ma’lum qilingandi.
Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng, 1-maydan dizel yoqilg‘isi narxi 500 so‘mga pasayib, 6500 so‘m qilib belgilangan. 3-maydan boshlab esa Ai-80 benzinining narxi 500 so‘mga pasayib, bir litri 4000 so‘mdan sotila boshlagan.
Bundan tashqari, “O‘zbekneftgaz” kompaniyasining UNG brendi ostidagi avtomobillarga yonilg‘i quyish shoxobchalarida 13-apreldan boshlab Ai-91 markasidagi benzinning bir litri narxi 5800 so‘mdan 5600 so‘mgacha pasaytirilgan. Shuningdek, dizel narxi 1-martdan boshlab 7500 so‘mdan 7300 so‘mga pasaytirilgan, 3-apreldan boshlab esa dizel narxi yana 300 so‘mga arzonlashtirilgan holda sotuvga chiqarilgandi.
Izoh (0)