Xorazm viloyati Xazorasp tumanida fuqaro temiryo‘l yonida uxlab qolganligi sababli Toshkentga ketayotgan poyezd bir muddat ushlanib qoldi. Bu haqda Ichki ishlar vazirligi Transportda xavfsizlikni ta’minlash bosh boshqarmasi xabar berdi.
Ma’lum qilinishicha, 8-noyabr kuni soat 18:35 da Xorazm viloyati IIB TXTBga “Urganch” lokomotiv deposi navbatchisi telefon orqali Bog‘ot—Xazorasp temiryo‘lining 357-kilometri 3-to‘siqda temiryo‘lning yonida noma’lum shaxs yotganligi sababli Xiva—Urganch—Toshkent” yo‘nalishidagi yo‘lovchi poyezdi shoshilinch to‘xtaganligi to‘g‘risida xabar bergan.
Voqea joyiga chiqilganda temiryo‘lning yonida Xorazm viloyati Xazorasp tumani Pichoqchi qishlog‘ida yashovchi, 1981-yilda tug‘ilgan E.I. mast holda uxlab qolganligi aniqlandi. Poyezd soat 18:29 da to‘xtab, soat 18:45 da o‘z yo‘nalishi bo‘yicha harakatni davom ettirgan. Holat yuzasidan surishtiruv ishlari davom etmoqda.
Izoh (0)