Toshkentda 70 ga yaqin jabrlanuvchiga qariyb 1,5 milliard so‘m zarar yetkazgan xususiy bandlik agentligining mansabdorlariga jazo berildi. Bu haqda “Kun.uz” xabar qilgan.
2020-yil oktabr oyining 5 kuni jinoyat ishlari bo‘yicha Mirzo Ulug‘bek tuman sudining hukmi bilan Jinoyat kodeksining 168-moddasi 4-qismi “v” bandi (uyushgan guruh tomonidan yoki uning manfaatlarini ko‘zlab sodir etilgan firibgarlik), 189-moddasi 1-qismi, 192(11)-moddasi 2-qismi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) “a, b” bandlari va 227-moddasi 2-qismi “a” bandida nazarda tutilgan jinoyatlarni sodir etganlikda ayblangan International experience xususiy bandlik agentligi MChJ direktori O.K. va xalqaro aloqalar bo‘yicha menejeri H.K. aybdor deb topilgan.
Sud tomonidan firma rahbari O.K.ga (ayol kishi) 4 yil 5 oy muddatga ozodlikdan mahrum qilish shartli jazosi tayinlanib, 2 yil sinov muddati belgilangan. Shuningdek, unga yetkazilgan moddiy zararni 1 yil 6 oy mobaynida to‘liq qoplash majburiyati yuklatilgan.
Firma menejeri H.K.(ayol kishi) tashkiliy-farmoyish va ma’muriy-xo‘jalik faoliyat yuritish huquqini beruvchi lavozimlarda ishlash huquqidan 3 yil muddatga mahrum qilingan va unga 5 yil-u 1 oy muddatga ozodlikdan mahrum etish jazosi tayinlangan.
Sud hukmi bilan 70 ga yaqin jabrlanuvchiga qariyb 1,5 mlrd so‘m moddiy zararni to‘lash belgilangan. Ayni paytda tergov organining depozit hisob raqamida saqlanayotgan 449 million so‘m pul yetkazilgan moddiy zararni qoplashga qaratiladi.
Mavzuga doir:
- Xususiy bandlik agentliklari tomonidan fuqarolarni aldash yo‘li bilan 80 milliard so‘mdan ortiq mablag‘ noqonuniy tarzda o‘zlashtirilgan
- O‘zbekistonda so‘nggi 18 oyda litsenziyasi bekor qilingan xususiy bandlik agentliklari soni 50 taga yetdi
- Toshkentda 1100 dan ortiq fuqaroni 6,2 mlrd so‘mga chuv tushirgan xususiy bandlik agentligining kirdikorlari fosh qilindi
Izoh (0)