“Barselona” hujumchisi Ansu Fati La Liga 9-turi doirasida kechgan “Betis”ga qarshi o‘yinda (5:2) jiddiy jarohat oldi.
Katalon klubi matbuot xizmatining ma’lum qilishicha, futbolchining meniskida (tizza bo‘g‘imidagi tog‘ay) yorilish yuzaga kelgan. Agar jarohat operatsiya qilinadigan bo‘lsa, tiklanish muddati ikki oydan to‘rt oygacha cho‘zilishi mumkin, deya xabar qilmoqda AS. Fati jarrohlik stoliga yotish yoki davolashning boshqa usulidan foydalanish masalasida bir qarorga kelishi kerak.
“Barselona”ning tibbiyot xodimlari meniskni saqlab qolishni maslahat bermoqda. Bunday holatda jarohatning kelajakdagi asoratlari kam bo‘ladi, biroq tiklanish jarayoni uzoq vaqtni talab qiladi.
Yana bir variant — yorilgan meniskni olib tashlash. Tiklanish jarayoni tez kechadi, biroq bu kelajakda jiddiy muammolarga olib kelishi mumkin.
Ijobiy tomonlardan biri shundaki, 18 yoshli futbolchi ichki meniskni shikastlab olgan, tashqisini emas — bunda tiklanish muddatiga kamroq vaqt ketadi.
Shu tariqa agar operatsiya o‘tkaziladigan bo‘lsa, futbolchi yanvar yoki mart oyida maydonga qaytishi mumkin.
Nima bo‘lgan taqdirda ham so‘nggi qarorni futbolchining o‘zi chiqaradi. O‘z navbatida “Barselona” yaqin orada operatsiya o‘tkazish uchun shifokorga murojaat qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)