Samarqand viloyati Pastdarg‘om tumanida YHXB inspektorlarining to‘xtash talabiga bo‘ysunmagan “Jiguli” haydovchisi “Volga” bilan to‘qnashdi, deya xabar bermoqda YHXBB.
Qayd etilishicha, 2020-yil 31-oktabrda Pastdarg‘om tumani “Amir Temur” MFY hududidan o‘tgan ichki yo‘llarning birida YHXB inspektorlari “VAZ-2101” rusumli avtomobilni to‘xtatgan. Lekin avtomashina xodimlarning qonuniy talabini bajarmay, harakatda davom etgan.
YHXB xodimlari avtomobilni mahalla ichki yo‘li va asosiy yo‘l kesishmasida to‘xtatmoqchi bo‘lganda haydovchi yana ularga bo‘ysunmay, asosiy yo‘lda kelayotgan “Volga” rusumli avtomashinaga urilib, yo‘l-transport hodisasi sodir etgan.
Haydovchi uni to‘xtatgan inspektorlarga bo‘ysunmay, ular bilan tortishib, bu voqeani telefoniga videotasvirga tushiradi.
Holat yuzasidan hujjatlar to‘planib, Pastdarg‘om tumani Ma’muriy sudiga taqdim etilgan.
Sudning qaroriga ko‘ra, haydovchiga nisbatan Ma’muriy javobgarlik to‘g‘risidagi kodeksning 194-moddasi 1-qismi bilan bazaviy hisoblash miqdorining 2 barobari miqdorida 446 000 so‘m jarima, shuningdek, kodeksning 195-moddasi bilan 7 sutka ma’muriy qamoq jazosi tayinlandi.
Izoh (0)