11—20-noyabr kunlari Floridada bo‘lib o‘tadigan RM Sotheby’s auksioni orqali 1990-yilda ishlab chiqarilgan afsonaviy Nissan 300 ZX Z32 avtomobili sotuvga qo‘yiladi. Ideal holatda saqlangan sportkar hozirga qadar 14 350 kilometr yo‘l bosgan, deb xabar beradi Motor.
Nissan 300ZX Z32 yapon Z-seriyasining ikkinchi avlodi hisoblanadi. Sportkar 1989-yildan 2002-yilga qadar ishlab chiqarilgan. 1990-yilda Amerikaning mashhur Motor Trend jurnali modelga “Yilning eng yaxshi xorij avtomobili” nomini bergan. Mazkur kupe tyuning uchun juda mos kelgani sabab uning hozirgi kunga qadar yaxshi saqlangan nusxasi deyarli uchramaydi.
Biroq sotuvga qo‘yilgan nusxa — umuman boshqa holat. 30 yil oldin Yaponiyadan AQShga olib kelingan sportkar ideal holatda. Avtomobil kuzovi Platinum Mist rangiga bo‘yalgan bo‘lib, o‘zining dastlabki holatini saqlab qolgan, biroq joyida zanglash alomatlari yo‘q. Ruli o‘ng tomonda joylashgan kupe qora charm bilan qoplangan, oynalarida esa haligacha original yapon etiketkalari saqlangan.
Nissan 300ZX Z32 kapoti ostidan 300 ot kuchiga (384 Nm) ega uch litrli V6 ikkitalik turboshishirma dvigateli o‘rin olgan. Agregat besh pog‘onali mexanik uzatmalar qutisi yordamida ishlaydi. Kupe soatiga 100 kilometr tezlikka 6 soniyada erishadi. Modelning qo‘shimcha boshqaruvchanligi orqa o‘qdagi faol tizim orqali ta’minlanadi. Auksion orqali sotuvga qo‘yilgan kupe narxi so‘rov yuborgan xaridorlarga ma’lum qilinadi.
Avvalroq Boney M guruhi asoschisiga tegishli noyob BMW M1 auksion orqali sotuvga qo‘yilishi to‘g‘risida xabar berilgandi.
Izoh (0)