BMW kompaniyasi Yevropada Xitoydagi dilerlik markazidan olib kelinadigan iX3 elektr yo‘ltanlamasini taqdim etdi, deb yozadi IXBT.
Ushbu modelning konseptual prototipi 2018-yilda taqdim etilgan edi. O‘shanda nemis avtomobilsozlik kompaniyasi bu beshinchi avlod elektr transmissiyasiga ega ilk transport vositasiga aylanishini va’da qilgandi. Shuningdek, bu BMW’ning 2013-yildan buyon ilk to‘liq elektroavtomobiliga aylangan. Bundan tashqari, iX3 modeli BMW’ning Xitoyda yasalib, boshqa mamlakatlarga eksport qilinadigan ilk elektromobili hamdir.
Elektromobilga o‘rnatilgan sig‘imi 74 kVT/soatga teng akkumulyator batareyalari WLTP testi bo‘yicha uning 460 kilometr yo‘l bosishini ta’minlaydi, bu esa real sharoitdagi yo‘llarda taxminan 300 kilometrga teng. Akkumulyator batareyasi 286 ot kuchiga ega elektrodvigatelni quvvatlantiradi. Uning yordamida mashina soatiga 100 kilometr tezlikka 6,8 soniyada erishishi mumkin. Quvvati 150 kVtga teng zaryadlash qurilmasi yordamida tezkor quvvatlanish funksiyasi ham mavjud.
BMW iX3’ni yig‘ish sentabr oyida boshlangan. Ilk mashinalar Yevropadagi dilerlarga yaqin kunlar ichida yetib keladi. Yangi mashinaning narxi 70 ming yevro.
Eslatib o‘tamiz, sentabr oyi boshlarida BMW kompaniyasi 2030-yilda havoga nol miqdorda zararli gaz chiqaradigan to‘qqiz modelni elektrifikatsiya qilishga oid rejasi bilan bo‘lishgandi.
Izoh (0)