Самарқанд вилояти Пастдарғом туманида ЙҲХБ инспекторларининг тўхташ талабига бўйсунмаган «Жигули» ҳайдовчиси «Волга» билан тўқнашди, дея хабар бермоқда ЙҲХББ.
Қайд этилишича, 2020 йил 31 октябрда Пастдарғом тумани «Амир Темур» МФЙ ҳудудидан ўтган ички йўлларнинг бирида ЙҲХБ инспекторлари «ВАЗ-2101» русумли автомобилни тўхтатган. Лекин автомашина ходимларнинг қонуний талабини бажармай, ҳаракатда давом этган.
ЙҲХБ ходимлари автомобилни маҳалла ички йўли ва асосий йўл кесишмасида тўхтатмоқчи бўлганда ҳайдовчи яна уларга бўйсунмай, асосий йўлда келаётган «Волга» русумли автомашинага урилиб, йўл-транспорт ҳодисаси содир этган.
Ҳайдовчи уни тўхтатган инспекторларга бўйсунмай, улар билан тортишиб, бу воқеани телефонига видеотасвирга туширади.
Ҳолат юзасидан ҳужжатлар тўпланиб, Пастдарғом тумани Маъмурий судига тақдим этилган.
Суднинг қарорига кўра, ҳайдовчига нисбатан Маъмурий жавобгарлик тўғрисидаги кодекснинг 194-моддаси 1-қисми билан базавий ҳисоблаш миқдорининг 2 баробари миқдорида 446 000 сўм жарима, шунингдек, кодекснинг 195-моддаси билан 7 сутка маъмурий қамоқ жазоси тайинланди.
Изоҳ (0)