Qamchiq dovonida Nexia o‘zidan oldinda ketayotgan Isuzu’ga urilishi natijasida 2 kishi halok bo‘ldi, deya xabar bermoqda YHXBB.
Qayd etilishicha, 2020-yil 4-noyabr soat 01:50 larda Toshkent–O‘sh yo‘lining 249-kilometrida 25 yoshli fuqaro Nexia rusumi avtomobilini boshqarib ketayotib, harakat xavfsizligini ta’minlay olmagan. Natijada o‘zidan oldingi Isuzu rusumli yuk avtomashinasining orqa tomoniga borib urilgan.
Oqibatda Nexia haydovchisi og‘ir tan jarohati olib, voqea joyida vafot etgan. Avtomashinada bo‘lgan yo‘lovchilardan biri bosh miya gumbazi suyagining ochiq sinishi tashxisi bilan shifoxonada vafot etgan. Yana 3 nafar yo‘lovchi turli tan-jarohati olgan.
Holat bo‘yicha surishtiruv ishlari olib borilmoqda.
Mas’ullar tomonidan ushbu YTHga sabab bo‘lgan omillar o‘rganildi. Unga ko‘ra, yo‘lning hodisa sodir bo‘lgan qismi tungi yoritish chiroqlari bilan yoritiladi. Shuningdek, 2021-yilda dovondagi yo‘l nishabini inobatga olib qo‘shimcha 9 ta favqulodda yo‘lakcha tashkil etish belgilandi.
Avvalroq Namanganda talabga javob bermaydigan avtomobil yo‘lida sodir bo‘lgan YTH oqibatida piyoda, Toshkentda daraxtga urilgan Spark haydovchisi va Samarqandda Damas urib ketishi natijasida velosipedchi halok bo‘lgani haqida xabar berilgandi.
Izoh (0)