AQShda o‘tgan bir sutka ichida koronavirus bilan kasallanganlar soni bo‘yicha navbatdagi rekord ko‘rsatkich qayd etildi, deb xabar beradi The Hill.
O‘tgan bir sutka davomida mamlakatda yana 118 ming kishida COVID-19 tasdiqlangan va 1187 kishi virus qurboniga aylangan. Kasallanish bo‘yicha yuqori ko‘rsatkichlar Kolorado, Illinoys, Minnesota, Pensilvaniya, Yuta va Viskonsin shtatlarida qayd etilgan.
Jons Hopkins ma’lumotlariga ko‘ra, pandemiya boshlanganidan buyon butun AQSh hududida koronavirusga chalinganlar soni 9,6 million kishidan oshgan. Hozirga qadar 234 mingdan ortiq bemor COVID-19 oqibatida vafot etgan. AQSh Kasalliklar nazorati va profilaktikasi markazining prognozlariga ko‘ra, noyabr oxiriga borib, koronavirus qurbonlari soni 266 ming kishiga yetadi.
Ta’kidlanishicha, ayrim shtatlar kasallar soni ortayotgani bois cheklovlarni joriy etmoqda. Xususan, Texasda ayrim korxona va tashkilotlarning faoliyatini to‘xtatish orqali ikki haftalik karantin e’lon qilingan, Massachusetsda esa aholiga kechasi 22:00 dan 05:00 ga qadar ko‘chaga chiqmaslik tavsiya etilgan.
Ayni vaqtda AQShda 3-noyabr kuni o‘tkazilgan prezidentlik saylovlaridagi ovozlarni hisoblash jarayonlari bo‘lib o‘tmoqda. Saylovoldi kampaniyasi doirasida Donald Tramp va uning raqibi Jo Bayden bir necha bor bir-birini koronavirusga qarshi kurashdagi harakatlari yoki rejalari bo‘yicha ayblagan edi. Tramp qattiq cheklovlarga qarshi va u karantin iqtisodiyotga zarar yetkazadi deb hisoblaydi. Bayden esa pandemiya vaqtida administratsiyaning harakatlarini “deyarli jinoyat” deb hisoblab, niqob rejimi minglab amerikaliklar hayotini saqlab qolgan bo‘lishi mumkinligini ta’kidlagan.
Eslatib o‘tamiz, 31-oktabr kuni ham AQShda 100 mingdan ortiq odamda koronavirus aniqlangan edi.
Izoh (0)