AP: Tramp koronavirus eng ko‘p tarqalgan okruglarda yetakchilik qilmoqda

AQSh prezidenti va Respublikachilar partiyasidan nomzod Donald Tramp koronavirus tarqalishidan eng ko‘p jabr ko‘rgan okruglarda ko‘pchilik ovozni qo‘lga kiritdi, deb yozadi “Kommersant” Associated Press agentligi o‘tkazgan tadqiqotlarga tayanib.

Agentlik aholi boshiga eng ko‘p COVID-19 bilan yangi kasallanish holatlari to‘g‘ri keladigan 376 ta okrugda tadqiqot o‘tkazdi. Tramp ularning 93 foizida g‘olib bo‘lgan yoki yetakchilik qilmoqda.

AP faqat kamida 95 foiz ovozlar sanab chiqilgan okruglarni hisobga oldi. Okruglar har 100 ming aholiga to‘g‘ri keladigan COVID-19 holatlari soniga qarab oltita toifaga bo‘lindi.

Bunday okruglarning ko‘pchiligi Montana, Shimoliy va Janubiy Dakota, Nebraska, Kanzas, Ayova va Viskonsinning qishloq joylarida joylashgan. Agentlikning qayd etishicha, u yerlardagi aholi ijtimoiy masofalanish va niqob taqish qoidalariga past darajada rioya qiladi.

AQShda 9,6 milliondan ortiq kishi koronavirusga chalingan, ularning 234 mingdan ziyodi vafot etgan. Avvalroq AQShda bir kunda aniqlangan kasallanish holatlari soni (102,5 ming) bo‘yicha rekord o‘rnatilgan edi.

Koronavirus tarqalishi tufayli bir qator amerikalik saylovchilar AQSh prezidenti saylovida pochta orqali ovoz berdi. Tramp pochta orqali ovoz berish odamlarni korrupsiyaga yetaklashini aytmoqda. Avvalroq YeXHTning AQShdagi missiyasi pochta orqali yuborilgan byulletenlarni ko‘rib chiqish chog‘ida qonun buzilishlari aniqlanmaganini aytgandi.

Tramp saylov uchastkalari yopilib bo‘lganidan keyin kelgan byulletenlar (pochta orqali) hisobga olinmasligini talab qilmoqda. Ayni paytda uning raqibi, AQSh sobiq vitse-prezidenti Jo Bayden “har bitta ovoz hisobga olinishi shart”ligini ta’kidlamoqda.

AQShning ikkita shtatidagi sudlar amaldagi AQSh prezidenti Donald Trampning davlat rahbari saylovlaridagi ovozlarni hisoblash yuzasidan bergan da’volarini rad etdi.

Avvalroq esa Yevropada xavfsizlik va hamkorlik tashkiloti Amerika prezidenti saylovlari chog‘ida qoidabuzarliklar aniqlanmaganini ma’lum qilgandi. Tashkilot “amaldagi AQSh prezidenti Donald Trampning Amerika prezidenti saylovlari chog‘ida qoidabuzarliklar yuz bergani haqidagi gaplari asossiz hamda aholining demokratik institutlarga nisbatan ishonchini poymol qiladi”, — deya bayonot bergan edi.

Demokratlar partiyasidan AQSh prezidentligiga nomzod Jo Bayden esa ovoz berish natijalarini xotirjam kutishga chaqirdi.