Sankt-Peterburg hokimiyati koronavirus tarqalishiga qarshi kurashish uchun yangi choralar ko‘radi. Tegishli farmonga shahar rahbari Aleksandr Beglov imzo chekdi, deya xabar bermoqda “RBK”.
Qayd etilishicha, Sankt-Peterburgda quyidagi cheklovlar joriy etiladi:
- 9-noyabrdan 29-noyabrgacha umumiy ovqatlanish shoxobchalari ishlamaydi. Temir yo‘l stansiyalari, yoqilg‘i quyish shoxobchalari va aeroportda joylashganlari bundan mustasno;
- savdo markazlaridagi bolalar xonalari yopiladi;
- binolarda 70 dan ortiq kishi qatnashuvidagi tadbirlarini o‘tkazish taqiqlanadi. Istisnolar sport majmualarida yoki madaniy obyekt bo‘lgan binolarda bo‘lib o‘tadigan tadbirlarda qo‘llaniladi;
- nikohni ro‘yxatdan o‘tkazishda ruxsat etilgan mehmonlar soni 20 kishigacha kamaytiriladi;
- qo‘shimcha ta’limga faqat masofaviy formatda ruxsat beriladi;
- 9-noyabrgacha shahar ma’muriyati xodimlarning kamida 30 foizini masofadan ishlashga o‘tkazadi.
Shuningdek, shahar aholisiga boshqa viloyatlarga va chet ellarga sayohat qilishdan tiyilish tavsiya qilindi.
Tezkor shtab ma’lumotlariga ko‘ra, so‘nggi ikki kun ichida Sankt-Peterburgda kuniga 1000 dan ortiq koronavirusga chalingan odam aniqlandi. 5-noyabrda yana 1093 kishida COVID-19 borligi aniqlandi. Bu pandemiya boshlanganidan beri yangi anti-rekord hisoblanadi.
Eslatib o‘tamiz, 2017-yilgi ma’lumotlarga ko‘ra, Sankt-Peterburgda 1 millionga yaqin O‘zbekiston fuqarosi mehnat qiladi.
Jons Hopkins universiteti ma’lumotlariga ko‘ra, Rossiyada 1 699 695 ta koronavirus bilan bog‘liq holat aniqlangan. Bemorlarning 1 271 349 nafari sog‘aygan, 29 285 nafari esa vafot etgan.
Avvalroq Gretsiyada umummilliy karantin tartibi e’lon qilingandi.
Izoh (0)