AQShning amaldagi prezidenti Donald Tramp faqatgina qonuniy ovozlar sanaladigan bo‘lsa, prezidentlik saylovlarida g‘olib chiqishini ma’lum qildi. Oq uyda o‘tkazilgan brifingda u Demokratlar partiyasini, yirik OAV, texnologik kompaniyalar va “katta pullarni” saylovlarga aralashishda aybladi, deb xabar beradi “Kommersant”.
“Agarda qonuniy ovozlar hisoblansa, men osonlikcha g‘alaba qozonaman. Noqonuniy ovozlar hisoblansa… ular bizning saylovlarimizni o‘g‘irlashga urinmoqda”, — deydi Tramp. Uning ta’kidlashicha, pochta orqali ovoz berish tizimi odamlarning tabiatida bo‘lmasa ham ularni korrupsiyaga undaydi. Shuningdek, Trampning ma’lum qilishicha, ijtimoiy so‘rovlarning tashkilotchilari saylovchilarni uydan chiqmasdan ovoz berishlarini o‘z oldiga maqsad qilib qo‘ygan.
“Endilikda barcha tan olayotganidek, OAV o‘tkazgan so‘rovlar katta ta’sir doiraga ega tomonlarning tom ma’noda saylovlarga aralashishi bo‘lgan”, — deya qayd etadi Tramp.
U qator OAVda e’lon qilingan so‘rovlarni “soxta va yolg‘on” deb atagan. Trampning aytishicha, ayrim OAV nomzodlar aslida deyarli bir xil darajada ketayotgan bir vaqtda Bayden yetakchilik qilayotgani haqida yozgan.
Donald Trampning so‘zlariga ko‘ra, respublikachilar Kongressning ikkala palatasida ham muvaffaqiyatga erishgan. “Biz demokratlarga qaraganda ikki barobar ko‘proq joyni himoya qilishga majbur bo‘lgan bo‘lsak-da, Senatni saqlab qoldik”, — deydi Tramp Senatdagi ko‘pchilik hali aniqlanmagan bo‘lsa ham.
Eslatib o‘tamiz, 5-noyabr kuni Tramp saylov uchastkalari yopilganidan keyin kelib tushgan byulletenlarni sanash kerak emasligini talab qilib, AQSh prezidentligi saylovida berilgan ovozlarni sanashni to‘xtatishga chaqirgandi.
Avvalroq Bayden prezidentlik saylovlaridagi o‘zining g‘alabasiga ishonishini ma’lum qilib, saylov natijalarini kutayotgan amerikaliklardan xotirjam bo‘lishni so‘ragan edi.
Izoh (0)